Pas vendimit të marrë nga Gjyqtarja Saida Dollani e cila pranoi pranoi kërkesën e Prokurorisë së Posaçme për rihapjen e çështjes “Gërdeci” ka reaguar ish-ministri i Mbrojtjes, Fatmir Mediu. Në një reagim zyrtar, përfaqësuesi ligjor i Mediut Ardian Visha thotë se vendimi është anti-kushtetues: “Vendimi i deklaruar në media nga Gjyqtarja e Apelit të Posaçëm, përbën një akt jo Kushtetues dhe pluri-shkelës të Konventës Europiane Për të Drejtat e Njeriut dhe një sërë ligjesh të tjera të vendit. Ai (vendimi) përbën një pavlefshmëri absolute e në çdo rast baza motivuese e tij nuk mund të jetë kurrë ligji. Është hera e parë në jurisprudence kur një gjyqtare e një gjykate të nivelit më të ulet prish vendimin e Gjykatës Lartë! Veç të tjerave shkelja e ligjit është e dukshme, sepse e njëjta çështje (kërkesë) është shqyrtuar dhe hedhur poshtë nga gjykata e shkallës parë dhe gjykata e apelit, Tiranë në vitin 2019. Ky vendim hapur cenon parimin e sigurisë juridike, parimin e gjësë së gjykuar, parimin e ligjit favorizues dhe për më tepër synon procedimin për një akuzë afati parashkrues i së cilës ka kaluar me kohë. Pasi të njihemi me “arsyetimin” e këtij akti të paligjshëm, do reagojmë me transparencë e me të gjitha mjetet ligjore të përshtatshme”, shkruan avokati Ardian Visha.
Apeli i Gjykatës së Posaçme kundër Krimit dhe Korrupsionit ka marrë sot vendimin që ish-ministri i Mbrojtjes, Fatmir Mediu, do të gjykohet.
SPAK kërkon revokimin e vendimit të Gjykatës së Lartë dhe rinisjen e gjykimit për ish-ministrin e Mbrojtjes për akuzën e shpërdorimit të detyrës në lidhje me tragjedinë e Gërdecit, ku nga shpërthimi i punishtes së demontimit të armëve mbetën 26 të vrarë dhe qindra të plagosur.
Gjykata e Posaçme e Apelit për Korrupsionin dhe Krimin e Organizuar vendosi të revokojë pushimin e vendimit të Gjykatës së Lartë, duke i hapur kështu rrugë gjykimit të kësaj çështje që ka kaq shumë vite që pret një zgjidhje.
“Me referimin në parashikimin e pikës 1, shkronja b), të nenit 46, të ligjit 98/2016 “Për Organizimin e Pushtetit Gjyqësor në Republikën e Shqipërisë” si dhe, në interesin e treguar nga media, komunikohet në mënyrë të përmbledhur se, sot më datë 24.09.2021, në Gjykatën e Posaçme të Apelit për Korrupsionin dhe Krimin e Organizuar, mbi ankimin e Prokurorit të Posaçëm dhe të trashëgimtarëve të viktimës E.D., u zhvillua seanca gjyqësore në dhomë këshillimi, për çështjen penale nr. 212 akti, datë 03.09.2021 regjistrimi, ku Gjykata vendosi, të ndryshojë vendimin nr. 60, datë 27.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar kërkesën e Prokurorit të Posaçëm dhe revokoi vendimin e pushimit nr. 6, datë 14.09.2009 të Kolegjit Penal të Gjykatës së Lartë, duke i kthyer aktet Prokurorit të Posaçëm për të proceduar”, thuhet në vendimin e Apelit të GJKKO.
