Fitorja me Elbasanin mbrëmjen e së dielës ka kthyer buzëqeshjen dhe qetësinë në kampin dinamovit. Këtë javë do të konkretizohet edhe ndryshimi në stol.
Daja do të marrë drejtimin e Dinamos në mesjavë, konkretisht ditën e mërkurë, kur do të kryejë edhe seancën e parë stërvitore me skuadrën kryeqytetase në Arbanë. Kundër Elbasanit 18 herë kampionët e vendit u drejtuan nga drejtori i akademisë, Erjon Xhafa, i cili mori detyrën e trajnerit të përkohshëm pas pezullimit te Dritan Mehmetit dhe kalimit të tij tek U-21. Gjatë javës pritet që klubi blu të bëjë edhe prezantimin zyrtar të trajnerit të ri.
Daja drejtoi të dielën ndeshjen e fundit në krye të Ballkanit, që dje ka zyrtarizuar largimin e tij me një postim falënderues për 57-vjeçarin. Trajneri kryeqytetas rikthehet te Dinamo pas 13 vjetësh me misionin për t’i rikthyer 18 herë kampionët e vendit në nivele të larta të futbollit shqiptar dhe minimalisht në kompeticionet europiane. Ai e ka drejtuar për herë të fundit Dinamon në shkurt të vitit 2011. Skuadra ndërkohë, pas fitores me Elbasanin, është lënë pushim dje dhe sot, ndërsa të mërkurën fillon epoka “Daja”.
Trajneri i ri do të ketë rreth një javë kohë për të përgatitur derbin me Partizanin, ku do të debutojë në stolin blu. Deri atëherë ai do të ketë mundësinë të shohë nga afër gjendjen dhe potencialin e çdo lojtari. Disa prej tyre në fakt janë të njohur për trajnerin, pasi kanë punuar më parë në skuadra të tjera, siç është rasti i Bruno Ditës, Dejvi Bregut, apo Rustem Hoxhës, apo ndonjë tjetri.
MERKATO – Dinamo kishte në tribunë gjatë ndeshjes me Elbasanin tre lojtarë të rinj, që të tre mbrojtës. Naser Aliji, mbrojtësi i majtë i Kombëtares, Agron Rufati dhe Antonio Miço “blindojnë” prapavijën e bluve për këtë sezon. Me ardhjen e Alijit pritet që Lorran të ketë më shumë hapësirë në mesfushë, ku kryeqytetasit kërkonin edhe një përforcim, por mundën të gjenin lojtarin e duhur.
Merkatoja është mbyllur teorikisht, por Dinamos mund t’i shtohet edhe një lojtar tjetër në sulm. Bëhet fjalë për ndonjë lojtar pa kontratë për momentin, nëse do të krijohet mundësia. I vetmi rol që blutë nuk e kanë të dubluar është ai i qendërsulmuesit, ku i gatshëm është Mandela, titullari që shënoi golin e parë në ndeshjen e fundit në Elbasan. Mbetet për t’u parë se si mund të ndryshojë skuadra nën drejtimin e Dajës, duke nisur nga derbi me Partizanin më 11 shtator.
Discussion about this post