Marrëveshja e Prespës e cila bëri ndryshimin e emrit të shtetit nga “Maqedoni” në “Maqedoni e Veriut” është rikthyer sërish në vëmendje.
Opozita vendase vijon të jetë e pakënaqur në lidhje me këtë vendim për të cilin fajësojnë Zaevin. VMRO DPMNE-ja, ka paralajmëruar se në rast se vjen në pushtet do të angazhohet për shfuqizimin e saj.
“Marrëveshja e Prespës është realitet. A na pëlqen neve ky realitet? Sigurisht se nuk na pëlqen. Këtë realitet na e solli Zoran Zaev, por nëse nuk respektohet ky realitet në kuadër të funksionimit administrativ të këtyre institucioneve, atëherë do të kemi probleme me instanca tjera, siç janë gjykata, prokuroria, e kështu me radhë. Se a do të punojmë për të ndryshuar këtë realitet, kur një ditë të kemi mundësi që të këta bëjmë, unë them se po, por për momentin ne të gjithë po veprojmë në bazë të këtij realiteti, që është i dhimbshëm, nënçmues për të gjithë ne që Maqedoninë e vlerësojmë si atdheun tonë”, deklaroi Mickovski.
Veprimi i asambleve komunale ka shkaktuar dhe reagimin e Ministrisë së Punëve të Jashtme.
Sipas tyre bëhet me dije se këto vendime prishin imazhin ndërkombëtar të shtetit dhe cënon rendin juridik të Republikës së Maqedonisë së Veriut.
Athina gjithashtu ka reaguar për zhvillimet e fundit nga ky vend.
“Kthimi i retorikës nacionaliste te fqinjët tanë mund të çojë në një ridefinim të pozicionit tonë kombëtar në mbështetje të procesit të zgjerimit të BE-së”, ka deklaruar zëvendësministri i Jashtëm grek.
Ai shprehu shqetësimin për zhvillimet në vend dhe theksoi se zbatimi i duhur i Marrëveshjes së Prespës është një nga parakushtet për kornizën negociuese të Shkupit me BE-në.
Partitë në pushtet kanë kundërshtuar menjëherë vendimet e opozitës duke bërë me dije se nuk do lejojnë që diçka e tillë të ndodhë.
“LSDM-ja dhe koalicioni nuk do të lejojnë që VMRO-DPMNE dhe Mickoski të rrezikojnë Marrëveshjen e Prespës, të na fusin në grindje të reja me Greqinë dhe fqinjët e tjerë, të na sjellin në konflikt dhe urrejtje të brendshme dhe kështu ta kthejnë vendin në të kaluarën e errët të regjimit”, ka deklaruar LSDM.
Discussion about this post