Siç edhe ishte paralajmëruar javën e shkuar, Maqedonia e Veriut ka shpallur këtë të martë zyrtarisht krizën energjitike.Kjo gjendje e jashtëzakonshme është parashikuar të zgjasi 30 ditë.Përmes këtij vendimi synohet injektimi i mjeteve në kompanitë energjitike dhe rritja e likuiditetit të tyre.
Kriza energjitike për qytetarët do të ndihet drejtëpërdrejtë në janar, pasi çmimi i energjisë elektrike parashikohet të rritet 8-9 përqind, teksa rreth 65 milionë euro do t’i kalojnë kompanive energjitike nga buxheti i shtetit.Ky fond i akorduar për kompanitë shihet si një formë për të kapërcyer risqet në këtë sektor dhe furnizimin e rregullt të qytetarëve me energji elektrike.
“Qeveria aktualisht është e fokusuar në përballjen me sukses të sfidave të paraqitura nga kriza globale energjetike. Gjendja e krizës energjetike sillet për të përmirësuar funksionimin e kompanive energjetike, për të rritur likuiditetin e tyre dhe për të mos miratuar asnjëherë masa kufizuese që do të ndikonin negativisht në jetën e përditshme të qytetarëve”, tha ministri i Ekonomisë i Maqedonisë së Veriut, Kreshnik Bekteshi.
Shkak për prodhimin e ulët vendas të energjisë elektrike është keqmenaxhimi i hidrocentraleve dhe termocentralëve. Infrastruktura e vjetër dhe mungesa e qymyrit për termocentralet janë shkaqet që çojnë në prodhimim e vetëm 10 për qind të kapaciteteve.
Maqedonia e Veriut importon energji elektrike nga Bullgaria, Serbia, Bosnja dhe Kosova, teksa çmimet mbeten shumë të larta, ndaj kostoja e përballimit të këtyre çmimeve në bursë është shpallja e gjendjes emergjente.
Sipas drejtorit të MEPSO-s, operatorit të shpërndarjes, Kushtrim Ramadanit, rezervat që vendi ka janë me kualitet të dobët, si pasojë dhe prodhimi do të jetë në masë të vogël.Hidrocentralet nuk mun të prodhojnë shumë për shkak të kushteve klimatike dhe keq menaxhimit të tyre, ndaj kjo sjell para një sezon të dimrit me rezerva tejet të ulëta në hidrocentrale dhe rënie të prodhimtarisë edhe nga energjia e ujit.
Discussion about this post