Kapiteni i Zvicrës, Granit Xhaka, thotë se lidershipin e ka mësuar që në moshën katërvjeçare, kur prindërit e tij shqiptarë punonin dy punë për të siguruar jetesën dhe ai mbante përgjegjësi për shtëpinë bashkë me vëllain e tij.
Mesfushori 33-vjeçar ka mundësinë ta udhëheqë Zvicrën drejt çerekfinales së parë të Kupës së Botës që nga viti 1954, nëse skuadra e tij mposht Kolumbinë.
“Besoj se lidershipin e kam mësuar që kur isha katër vjeç. Prindërit e mi punonin gjithë ditën për të na siguruar gjithçka që na duhej. Më lanë çelësat e shtëpisë dhe që atëherë mora përgjegjësi”, u shpreh Xhaka.
Ai kujtoi se ai dhe vëllai i tij, Taulanti, kalonin deri në 18 orë vetëm në shtëpi, ndërsa nëna dhe babai punonin pa pushim.
“Sot kam dy vajza gjashtë dhe katër vjeç dhe nuk mund ta imagjinoj t’i lë vetëm për kaq shumë orë. Por ne e përjetuam këtë. Nëna ime zgjohej në katër të mëngjesit, përgatiste ushqimin, punonte gjithë ditën dhe më pas shkonte në një punë të dytë. Edhe babai im bënte të njëjtën gjë”, tha ai.
Xhaka foli edhe për historinë e vështirë të familjes së tij. Babai i tij, Ragipi, u burgos për pjesëmarrje në demonstrata kundër regjimit serb të Slobodan Millosheviçit dhe kaloi tre vite në burg, ku, sipas rrëfimeve të tij, pësoi dhunë dhe tortura.
Pas lirimit, familja u largua drejt Zvicrës, ku Xhaka dhe vëllai i tij nisën rrugëtimin që i çoi në futbollin profesionist. Graniti zgjodhi të përfaqësojë Zvicrën, ndërsa Taulanti veshi fanellën e Shqipërisë.
Mesfushori kujtoi edhe periudhën e vështirë te Arsenali, kur humbi shiritin e kapitenit pas incidentit me tifozët në vitin 2019.
“Ajo errësirë ishte vetëm kur isha vetëm, por më mësoi shumë. Më bëri më të fortë”, u shpreh ai.
Pas rikthimit në formë me Arsenalin, suksesit te Bayer Leverkusen dhe aventurës së re në Premier League me Sunderlandin, Xhaka mbetet i përulur.
“Nuk harrojmë kurrë nga kemi ardhur”, përfundoi kapiteni i Zvicrës.
Discussion about this post