Kryeministri i Kosovës Albin Kurti ka reaguar në lidhje me lajmin e rrëmbimit të tre policëve të Kosovës.
Kurti shprehet se policët mund të jenë rrëmbyer nga ana e ushtrisë së Serbisë. Sipas Kurtit, rrëmbimet janë hakmarrje e shtetit serb, edhe për shkak të arrestimit më herët të një serbi tepër problematik.
“Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.
Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës.
Policia e Kosovës është treguar tejet e vetëpërmbajtur këto javët e fundit.
Hyrja e forcave të Serbisë në territorin e Kosovës është agresion dhe synim për eskalim dhe destabilizim.
Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë”, shprehet Kurti.
Discussion about this post