Rrëshqitje gurësh dhe dherash, probleme me qarkullimin në disa rrugë të Kukësit

Qarku i Kukësit gjatë mbrëmjes ishte i përfshirë nga moti i keq me reshje shiu, duke shkaktuar probleme në lëvizjen e akseve nacionale e rurale.

Akset rrugore si Kukës-Bushtricë, Kukës-Shishtavec, Krumë-Kam-Tropojë, Bajram Curri-Fierz-Qaf Mali vijojnë të jenë të përfshira nga rënja e gurëve e dherave.

Por situata paraqitet problematike në aksin kombëtarë Kukës-Qaf Mali-Pukë ku nga segmenti Kolsh-Qaf Shllak ka prezencë të gurëve e dherave në rrugë, ndërsa njëra korsi vende vende është e bllokuar nga gurët e dherat.

Gjatë natës dhe në mëngjes në këtë segment nuk kishte asnjë punonjës apo mjet të firmës kontraktuese për largimin e dherave e gurëve në rrugë.

Ky aks është i përfshirë edhe nga mjegulla e dendur çka vështirëson më tej kalimin për shkak të kufizimit të fushpamjes.