Pas Kukësit, Durrësit dhe Tiranës, ditën e sotme kanë nisur protestat kundër rritjes së çmimit edhe në Vlorë e Shkodër. Këtë paradite Studentët e fakultetit të Shkodrës janë bërë bashkë në këtë protestë, ku kërkojnë të gjithë të rinjve që të bashkohen larg politikës, për të mbrojtur xhepat e tyre dhe të familjarëve.
“Ditën e djeshme është zhvilluar një protestë për rritjen e çmimeve të ushqimeve, sot jemi mbledhur së bashku me bashkëmoshatarët kundër rritjes së çmimit të naftës. Nëse nga Vau i Dejës biletën e ka pas 2 mijë lekë të vjetra, tashmë duhet që të paguajë 3 mijë lekë të vjetra. Këto çmime bien në xhepat e gjithsecilit prej nesh dhe të familjeve tona, por në pamundësi për të ardhur në Tiranë dhe për të protestuar sot jemi mbledhur bashkë për të dhënë një mesazh për të gjithë studentëve, se ne nuk vijmë në shkollë për të blerë bukë dhe cigare por për ty arsimuar”, ka thënë një nga studentët.
Gjithashtu protesta janë zhvilluar edhe në Vlorë ku qytetarët janë shprehur kundër rritjes së çmimeve ku theksojnë se e kanë të pamundur të përballojnë një kosto të tillë. Qytetarët për disa minuta kanë bllokuar qarkullimin në aksin Vlorë-Skelë. Ata thonë se rritja e çmimeve do të pengojë edhe turizmin, pasi edhe ata do detyrohen të rrisin çmimet e shërbimeve, ndërsa theksojnë se shumë familje po mbeten pa ushqime dhe në uri totale.
Discussion about this post