Deputetët e PD i janë drejtuar me një shkresë zyrtare Komisionit të Ekonomisë për thirrjen në seancë dëgjimore të Autoritetit të Konkurences në datën 10 tetor.
Deputetja e PD, Sorina Koti u shpreh para mediave se Autoriteti duhet të japë llogari para Komisionit dhe para të gjithë shqiptarëve për faljen e gjobës ndaj kompanive që rritën çmimin e bukës. Sipas PD, rritja e çmimit të bukës, ka sjellë efekt zinxhir rritjen e çmimeve të produkteve të shportës, duke ndikuar në thellimin e varfërisë.
Ditën e djeshme u bë publik vendimi se Autoriteti i Konkurrencës nuk i ka ndëshkuar importuesit e miellit dhe grurit, pavarësisht se u kapën në shkelje gjatë korrikut të vitit të kaluar. Në këtë raport ishte parashikuar një gjobë 5 milion euro ndaj të pesta kompanive, Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK, por Autoriteti ka hedhur poshtë gjobën me justifikimin se të dhënat nuk lidheshin me realitetin e sotëm.
