Rritja e ndjeshme e numrit të të infektuarve nga COVID-19 gjatë javëve të fundit, ka bërë që Ministria e Shëndetësisë dhe Mbrojtjes Sociale të marrë vendimin e riaktivizimit të koncesionit të check-up, që u pezullua pikërisht për shkak të situatës së krijuar nga pandemia. Njoftimin e ka bërë të ditur ministrja Ogerta Manastirliu, ku tha se do të rifillojë kontrolli mjekësor bazë për qytetarët 35-70 vjeç.
Në postimin e saj thuhet se programi do të rifillojë në çdo qendër shëndetësore në vend, teksa e cilëson kontrollin si të dobishëm për parandalimin e sëmundjeve kronike dhe monitorimin e pasojave post-covid. Shërbimi u ndërpre përkohësisht nga gjysma e dytë e muajit mars të vitit të kaluar, rinisi në fund të muajit shtator dhe me pas u ripezullua për shkak të situatës së krijuar nga COVID-19. Ndërkaq, pavarësisht pezullimit të përkohshëm, për vitin 2020, për koncesionin e check-up u paguan 352 mln lekë, ndërkohë që sipas të dhënave rezulton se kompania koncesionare është paguar edhe për kontrolle që nuk janë kryer.
Këtë e tregon edhe vet, Ministria e Shëndetësisë dhe Mbrojtjes Sociale ku raporton realizimin e 101,426 kontrolleve check up gjatë vitit të kaluar, teksa sipas qeverisë, një check-up kryhet nga koncesionari me 1 537 lekë, çka do të thotë se në total kosto për kontrollet e raportuar shkon në 155.89 mln lekë. Diferenca prej 194.11 mln lekë e paguar nga buxheti i shtetit për koncesionarin, duket se nxjerr në pah konstatimet e bëra më herët nga Kontroli i Lartë i Shtetit për mbrojtjen që iu sigurojnë kushtet e kontratave kompanive koncesionare, që përfitojnë para’ publike për shërbime të pakryera. Kjo pasi, nga auditimi mbi monitorimin e kontratës së check-up rezultoi se pagesat e marra tepër nga koncesionari, për punën e pa kryer për vitet 2015, 2016, 2017 dhe 2018, shkojnë në 801 milion lekë.
