Partia Demokratike paralajmëron se në mazhornaca do të japë llogari një për një për rritjen e çmimit të bukës, energjisë dhe karburanteve. Kështu ka deklaruar zëdhënësja e grupit parlamentar të PD-së, Oriola Pampuri, gjatë një interviste televizive ditën e sotme.
Sipas Pampurit, deklarata e kryeministrit Rama përhapi panik te qytetarët dhe nuk dha argumente se si do të përballohet kjo krizë.
“Nga dje ka lindur diskutimi që Rama i hapi rrugë për rritjen e çmimit të karburanteve dhe një kryeministër i përgjegjshëm nuk do të dilte dhe të përhapte panik, por do ta argumentonte sa do të jetë kriza? Afatshkurtër apo afatgjatë dhe sesi do ta përballonte qeveria në lidhje me shtresat në nevojë. Sa kryefamiljarë janë futur në burg se nuk kishin për të paguar energjinë elektrike dhe sot përballemi me rritje të çmimit të energjisë”, u shpreh ajo.
Ajo theksoi se kjo do të çojë në varfëri ekstreme dhe në kushte mbijetese shtresat e mesme dhe të varfra, ndërsa do të favorizojë oligarkët dhe miqtë e Ramës.
“Rritja e çmimit të bukës dhe të çmimeve të shportës të gjitha këto të çojnë te varfëria ekstreme e qytetarëve. Oligarkët e Ramës nënfaturohen dhe nuk e paguajnë sa duhet këtë energji. Të gjitha këto kanë vetëm një grup që preken fort shtresa e varfër dhe e mesme. Kryeministri nuk jep zgjidhje, por përhap panik. Është një luftë për mbijetesë. Do të rritet më shumë nga ç’është sot. Në 8 vite çmimi i energjisë dhe karburanteve është rritur pastaj në shifra e konvertojnë ekspertët”, tha ajo.
Për Pampurin kjo është një keqmenaxhim i qeverisë, pasi Shqipëria shet shumë lirë energji dhe blen shumë shtrenjtë kur i duhet. Ajo sugjeron se shpenzimet që bëhen për tendera mund t’i viheshin në dispozicion familjeve në nevojë.
E. H/ gijotina.com/
