Policia e Shtetit ka intensifikuar kontrollet ditët e fundit duke evidentuar dhe ndëshkuar 1120 drejtues mjetesh, për shkelje të rregullave të qarkullimit rrugor.
Sipas njoftimit, në të gjithë vendin janë konstatuar dhe arrestuar 13 drejtues mjetesh, nga të cilët 8 për drejtim mjeti në gjendje të dehur dhe 5 për drejtim mjeti pa leje drejtimi.
Gjithashtu, janë pezulluar 35 leje drejtimi, nga të cilat 25 për shpejtësi mbi normat e lejuara dhe 10 për drejtim mjeti nën efektin e alkoolit.
Policia njofton se janë dënuar me gjobë deri në 4.000 lekë të rinj, për shpejtësi tej normave të lejuara dhe 67 masa administrative me vlerë 5.000 lekë të rinj për drejtim mjeti nën efektin e alkoolit. Janë vendosur gjithashtu 4 masa administrative me vlerë nga 10.000 deri në 40.000 lekë të rinj, për mos rregullim shpejtësie në qendrat e banuara.
Policia e Shtetit i bën thirrje drejtuesve që të tregojnë kujdes dhe të zbatojnë me rigorozitet rregullat e qarkullimit rrugor, pasi gjatë fundjavës lëvizjet në disa akse rrugore janë më të shtuara.
