Në konferencën e përbashkët me kryeministrin Edi Rama, kreu i qeverisë holandeze, Mark Rutte u pyet se çfarë reformash ka bërë Shqipëria, që shteti i tij ndryshoi mendje vetëm pak muaj pas zgjedhjeve për të thënë po për çeljen e konferencës ndërqeveritare.
Rutte tha se vendi ynë ka bërë hapa para sa i takon Reformës në Drejtësi, dhe sipas tij BE duhet të tregohet e ndjeshme me situatën në Ballkanin Perëndimor, për shkak të ndikimit që mund të ketë nga forca të tjera, duke iu referuar Rusisë apo Kinës.
“Kemi një marrëdhënie shumë të ngushtë bashkëpunimi në këto dy vite kundër krimit të organizuar, rritjen e fuqisë së policisë, kemi folur për rritjen e mëtejshme të bashkëpunimit. Ne i shohim raportet e Komisionit Europian, se ku Shqipëria qëndronte në raport me Reformën në Drejtësi, Vettingun, por progresi ka qenë kaq i madh, sa ka bërë që ne të themi po. Nuk është thjesht çështje e krimit të organizuar, por është dhe çështje e respektimit të ligjit të të drejtave. Ne e duam këtë rajon në BE, për gjithçka përfaqësoni, por edhe për forca të tjera që mund të ndikojnë në këto shtete, flasim këtu në aspektin gjeopolitik”, tha Ruette.
Më herët ai tha se Holanda është pro hapjes së negociatave, por kushtëzoi mbajtjen e konferencës së parë ndërqeveritare pa u zgjidhur konflikti për veton mes Bullgarisë dhe Maqedonisë së Veriut.
Discussion about this post