Sigurimi i mjeteve me targa shqiptare që udhëtojnë jashtë territorit të vendit tonë, është shoqëruar me një rritje prej 21.71% të numrit të kontratave krahasuar me periudhën janar-maj 2023. Rritja në numrin e kontratave është shoqëruar edhe me rritjen prej 1.60% të vëllimit të primeve të shkruara bruto nga sigurimi “Karton Jeshil”.
Si pasojë e flukseve të shtuara të shtetasve që përdorin makinën e tyre për të udhëtuar jashtë Shqipërisë, ka pasur një numër gjithnjë e më të lartë të personave që zgjedhin sigurimin me “Karton Jeshil”. Nga të dhënat e INSTAT rezulton se në 5 muajt e parë të vitit, rreth 3 milionë shqiptarë kanë udhëtuar jashtë vendit duke përdorur një nga mënyrat e transportit rrugor, detar apo ajror.
Sa i takon sigurimit të mjeteve motorike me targa të huaja që qarkullojnë brenda territorit të vendit tonë, të ardhurat nga ky sigurim kanë pasur një rritje prej 3.43%. Ndërkohë që edhe numri i kontratave u rrit me 5.33%. Në periudhën janar-maj 2024 janë shënuar 6.1 milionë hyrje-dalje të shtetasve shqiptarë dhe të huaj. Përveç të huajve që zgjedhin të sigurojnë makinën e tyre kur futen në territorin shqiptar, ka edhe shumë emigrantë shqiptarë me makina me targa të huaja të cilët preferojnë sigurimin kufitar.
Sipas të dhënave nga Autoriteti i Mbikëqyrjes Financiare, të ardhurat nga sigurimi i mjeteve motorike kapën shifrën 5.3 miliardë lekë në 5 muajt e parë të këtij viti. Fitimi i kompanive të sigurimit u rrit me 11.53% krahasuar me janar-maj 2023.
Për mjetet motorike që qarkullojnë brenda vendit tonë, bashkarisht me shumën e të ardhurave ka pasur një rritje prej 13.21% të numrit të kontratave nga sigurimi MTPL e brendshme.
Discussion about this post