Për lajmin e publikuar nga portali Syri.net, ku shkruhej se sekretari i Partisë Demokratike ndjek në rrjetet sociale djalin e George Soros dhe u jep pëlqime postimeve të tij, ka reaguar Gazmend Bardhi.
Me anë të një postimi në facebook, Bardhi thotë se kjo është një shpifje dhe një fotomontazh për të denigruar figurën e tij.
“Kur vendosa të përfshihem në politikë, e bëra me besimin se përfaqësoj shumë të rinj të ndershëm, me integritet, të përkushtuar dhe profesionistë, që duan të bëjnë diçka të mirë për vendin. Nuk jam penduar për asnjë moment, megjithëse këtë vit, më shumë se kurrë më parë jam ndeshur me situata dhe sulme politike, kryesisht shpifje për të denigruar figurën time. Në të shumtën e herëve më vjen të qesh, por ka edhe raste që revoltohem me padrejtësinë, ligësinë dhe intensitetin e lartë të injorancës e vulgaritetit që përmbajnë sulmet.
Një nga këta raste është edhe shpifja e sotme, në adresën time nga Syri.net. Është për të ardhur keq sesi halli personal i drejtuesve të portalit e ka degraduar atë kaq shpejt. Pas gati 3 muaj sulmesh personale, sot kanë arritur nivelin më të ulët njerëzor, duke sajuar një fotomontazh, të denjë për Sigurimin e Shtetit. Një meme mercenare, e publikuar në rrjetet sociale, Syri.net e ka sajuar si lajm për të më goditur mua për faktin e vetëm se nuk i qaj dot hallin e madh personal që ka zënë drejtuesit e portalit” – shkruan Bardhi.
Bardhi më tej shkruan se nuk do të lejoj askënd që me mekanizma mafiozë si i sotmi, ta shfokusojnë në ushtrimin e përgjegjësive përpara demokratëve dhe për këtë do të depozitojë një padi penale për shpifje dhe padi civile për fyerje ndaj portalit Syri.net
“Kur hyra në politikë, vendosa të mos jap asnjë rëndësi lajmeve të rreme në lidhje me mua, por ky rast më ka bërë të reflektoj. Nuk do të lejoj që për shkak të pozicionit tim politik, të cenohet morali im, dinjiteti im njerëzor dhe aq më pak familja ime! Nuk do të lejoj kurrë askënd, që me mekanizma mafiozë, si ky i sotmi, të më shfokusojë në ushtrimin e përgjegjësive përpara demokratëve. Për këtë arsye, kam vendosur të depozitoj padi penale për shpifje dhe padi civile për fyerje ndaj portalit Syri.net.
Kushdo në Syri.net apo aleatë të tij të dukshëm e të padukshëm, që mendojnë se me sajesa, fotmontazhe, me fyerje dhe sharje do të më intimidojë, gabohet rëndë! Hallet dhe problemet personale do të duhet t’i mbani në shtëpinë tuaj, jo në shtëpinë e demokratëve” – përfundon Bardhi.
Në lajmin e prortailt Syri.net shkruhej se Gazmend Bardhi, Sekretari i Përgjithshëm i emëruar i Partisë Demokratike i ka bërë ‘like’ një postimi të djalit të miliarderit Soros, Aleksit. Ky i fundit kishte zëvendësuar flamurin amerikan me atë të komunitetit LGBT me ngjyrat e ylberit.
Sipas Syri.net, PD me Bashën e Bardhin po heqin dorë edhe publikisht nga ideologjia konservatore, duke e zëvendësuar atë me ideologjinë majtiste të Xhorxh Soros, armikut të konservatorëve dhe familjes tradicionale në të gjithë botën.
Discussion about this post