Sot mblidhet samiti i BE me liderët e Ballkanit Perëndimor në Slloveni, në fokus të së cilit pritet të jetë integrimi i Ballkanit Perëndimor në Bashkimin Europian.
Nisja e Samitit do të jetë në orën 08:40 të mëngjesit të sotëm, ndërsa pritet që në orën 13:30 të ketë edhe një konferencë për mediat.
Josep Borrell, përfaqësues i BE për politikën e Jashtme ka reaguar për samitin në fjalë dukë thënë se aktualisht bota po përballet me sfida të mëdha gjeopolitike.
“Po përballemi me sfida të mëdha. Bota sot po pëson ndryshime rrënjësore gjeopolitike. Pika jonë e përbashkët strategjike është Bashkimi Europian”, mësohet të jetë shprehur ai.
Borrell gjithashtu deklaroi se Komisioni Europian kishte propozuar një takim të ministrave për të diskutuar lidhur me sfidat që po has Bashkimi Europian.
Në samit pritet të diskutohet rreth riafirmimit të perspektivës evropiane të Ballkanit Perëndimor, i cili është me interes strategjik reciprok dhe mbetet një zgjedhje e përbashkët strategjike. Gjithashtu në qendër të bisedimeve do jetë dhe zhvillimi i bashkëpunimit dhe rimëkëmbja socio-ekonomike të rajonit, në kontekstin e pandemisë së Covid-19.
