Serbia edhe njëherë po tregon se mbështet Rusinë dhe ka qëllime po aq të këqija sa ajo. Presidenti Aleksandër Vuçiç ka njoftuar se që prej ditës së nesërme, Serbia do të ndalojë eksportet e drithërave të bukës si dhe të vajit. Gjatë një interviste televizive Vuçiç u shpreh se eksportet janë rritur shumë dhe për këtë arsye do të bllokohen, për të përballuar nevojat e brendshme.
Ndër të tjera , ai tha se Qeveria do subvencionojë çmimin e naftës për ta mbajtur atë të stabilizuar. “Ne do të subvencionojmë që çmimi i euro-naftës në të gjitha pikat e karburantit të Industrisë së Naftës së Serbisë të mbetet së paku 179 dinarë [rreth 1.5 euro] për të paktën një muaj e gjysmë. Për të gjithë të tjerët do të ketë rritje minimale”, tha Vuçiç.
Vuçiç shtoi se Serbia është në pritje të vendimit të Bashkimit Evropian për importin e energjisë nga Rusia. Shtetet e Bashkuara e ndaluan atë të martën, si ndëshkim për Rusinë, e cila ka pushtuar Ukrainën. “Nëse vendimi është që të ndalohet importi i të gjitha burimeve të energjisë nga Rusia, atëherë edhe ne jemi në telashe. Nuk kemi ku t’i marrim, nafta dhe gazi nuk mund të bien nga qielli”, tha Vuçiç.
Ky vendim i Serbisë shkon në të njëjtën linjë me Rusinë, e cila pas vendosjes së sanksioneve ndaloi eksportet e drithërave. Serbia ka mbështetur integritetin territorial të Ukrainës, por nuk u është bashkuar sanksioneve që BE-ja ka vendosur kundër Moskës.
Discussion about this post