Pavarësisht fillimit të kampionatit, skuadrat e Superiores, ende nuk kanë mbaruar punë me riformatimin e skuadrave të tyre, duke afruar si dhe larguar lojtarë, në mënyrë që të jenë të plotësuara, pas datës 31 gusht kur edhe mbyllet dritarja e merkatos verore 2023.
Në protokollin e Dinamo City për ndeshjen me Tiranën binin në sy disa lojtarë që mungonin. Disa prej tyre janë thuajse të larguar nga skuadra, edhe pse klubi nuk ka mbajtur asnjë qëndrim zyrtar. Portieri italian Krosta dhe mesfushori sllovak David Ivani janë thuajse të larguar, ashtu siç gazeta ka bërë me dije edhe më parë.
Në të njëjtën situatë duket edhe Redon Danaj, ndërkohë që diçka ka ndryshuar për mbrojtësin Ali Samake dhe mesfushorin Erisildo Smaçi.
Më parë këta dy lojtarë bënin pjesë në listën e largimeve, por të paktën për momentin do të mbeten pjesë e skuadrës.
Blutë kërkuan edhe një mbrojtës qendre, që deri tani nuk ka ardhur dhe kjo ndoshta shpjegon qëndrimin e Samakes, kurse Smaçi ka kërkuar të luajë shanset e tij për të qenë protagonist edhe në Superiore.
Në derbi mungonin edhe Patrik Bardhi për shkak dëmtimi, si dhe Karamba, që është bashkuar me grupin me vonesë./PanoramaSport
Discussion about this post