Këtë të dielë në orën 16:45 Vllaznia do të ndeshet me Tiranën në ‘Loro Boriçi’ për javën e shtatë të Superligës.
Duke folur në prag të kësaj sfide trajneri i ‘Bardhebluve’, Orges Shehi është shprehur se shkodranët i sheh si rivalët më të mëdhenj për titullin kampion të këtij sezoni.
Teksa nuk harroi të theksonte se skuadra e tij është në një formë shumë të mirë dhe vjen pas fitores së derbit, por shtoi se qëndron me këmbë në tokë dhe se do japë maksimumin.
“Është klasikja e futbollit shqiptar, me dy skuadra mjaft të forta, që kanë në organikën e tyre lojtarë që mund të bëjnë diferencën e të dhurojnë spektakël. Do të jetë shumë e luftuar dhe me rivalitet, ndaj shpresoj t’ia dalim. Mendoj se nuk duhet të jemi të varur nga një individ, pasi kushdo që do të luajë, do të japë maksimumin.
Kemi pasur pak ditë për të përgatitur ndeshjen dhe gëzimi është i madh për fitoren në derbi, por nuk ka vend për eufori, pasi ka ende shumë javë kampionat. Ndaj Vllaznisë do të jetë përballje e fortë dhe e vështirë, pasi edhe vitin e kaluar garoi për titull, duke dalë e dyta vetëm prej golavarazhit.
Statistikat i përkasin të shkuarës dhe nuk vlejnë në fushë. Edhe para derbit u tha që nuk kemi fituar së fundi, por në fushë morëm tre pikët. Ne jemi një skuadër e re, që kemi ende shumë punë përpara, por jemi Tirana dhe dihen objektivat tona.
Shumicën e gjërave dua t’i bëj si në derbi, por jo gjithmonë dalin, pasi edhe unë gaboj, ashtu si edhe lojtarët. Ne duhet të futemi në fushë me përqendrim maksimal dhe të vlerësojmë kundërshtarin, pasi janë shumë të rëndësishme ndeshjet direkte”, –deklaroi Orges Shehi.
Aktualisht Tirana qëndron në krye të tabelës me 14 pikë, ndërsa Vllaznia renditet në vendin e katër me 9 pikë në gjashtë ndeshje të luajtura./K.T/Gijotina.com
