Policia e Lezhës ka arrestuar 57-vjeçarin Bashkim Alija, i dyshuar si shkaktari i zjarrit të madh që përfshiu malin e Shëngjinit dhe shkaktoi dëme të konsiderueshme në sipërfaqe pyjore.
Sipas hetimeve paraprake, ngjarja ka ndodhur më 3 korrik në zonën e quajtur “Sagë”, ku Alija dyshohet se kishte ndezur zjarr për të djegur mbeturina pranë subjektit të tij tregtar. Flakët dolën jashtë kontrollit dhe, të favorizuara nga kushtet atmosferike, u përhapën me shpejtësi drejt masivit pyjor.
Gjatë përhapjes së zjarrit u regjistrua edhe një shpërthim, i dyshuar si pasojë e aktivizimit të një predhe të pashpërthyer nga temperaturat e larta.
Si pasojë mbeti i lënduar lehtë shtetasi A. U., 30 vjeç, i cili ndodhej në një automjet në lëvizje. Ai mori ndihmë mjekësore dhe ndodhet jashtë rrezikut për jetën.
Hetimet zbuluan gjithashtu se në ambientet e biznesit të të dyshuarit ishte hequr DVR-ja e kamerave të sigurisë, veprim që dyshohet të jetë kryer për të penguar zbardhjen e ngjarjes.
Në përfundim të veprimeve procedurale, Bashkim Alija u arrestua në flagrancë dhe ndaj tij rëndojnë akuzat për “Shkatërrim prone nga pakujdesia”, “Shkatërrim nga pakujdesia me zjarr i pyjeve dhe mjedisit pyjor”, “Veprime që pengojnë zbulimin e së vërtetës” dhe “Plagosje e lehtë nga pakujdesia”.
Hetimet për dokumentimin e plotë të ngjarjes vijojnë.
Discussion about this post