Sot ka përfunduar afati që disa artistë të Teatrit Kombëtar i lanë kryeministrit Edi Rama dhe Ministres së Kulturës Elva Margaritit për rishikimin e pagave të tyre. Qeveria nuk ka dhënë ende një përgjigje zyrtare për kërkesat e tyre, por ministrja ka zhvilluar deri një takim me përfaqësues të Sindikatës së Artistëve, dhe shpjegon se çfarë pritet të ndodhë më tej.
“Çdo dy javë secili prej drejtuesve të institucionit, bën takime të dedikuara në Ministrinë e Kulturës dhe e dimë që kjo është një problematik e përbashkët. Patjetër do ta çojmë përpara dhe do të kërkojmë që të jetë e mire adresuar dhe në kohën e duhur. Sot Qeveria shqiptare po punon fort që të përballet me krizën energjetike dhe nuk mund të nisemi thjesht nga egoja personale, ku çdokush prej nesh, qoftë drejtues institucioni a punonjës i thjeshtë i administratës apo artistë institucioni, vepron duke vendosur afate përpara një shtëpie të madhe që është qeveria shqiptare”, thotë ministrja e Kulturës Elva Margariti.
Ndërsa sa i përket situatës në Teatrin Eksperimental “Kujtim Spahivogli”, ku artistë si Ermira Hysa, Ardiana Tolka, Endri Çela e të tjerë, janë lënë të paangazhuar thuajse gjatë gjithë mandatit si drejtor të regjisorit Altin Basha, vetë artistët i kanë bërë me dije situatën Ministrisë së Kulturës në krye të këtij viti.
“Si Teatri Eksperimental, ashtu edhe Teatri Kombëtar, mendoj se kanë nevojë që angazhimi i artistëve të fillojë të ketë format e duhura jo vetëm të një page të administratës po edhe për përfshirje në projekte. Janë aktorët ata që mund të jenë të angazhuar edhe në më shumë projekte edhe jashtë institucioneve, Teatrit Kombëtar dhe atij Eksperimental “Kujtim Spahivogli”, kështu që ka qenë një kërkesë të cilën e kemi shtruar me të dy drejtorët për të parë me sa më shumë efikasitet këtë elementin e kontratës së përhershme brenda një institucioni, besoj lidhet edhe me zhanrin e këtij institucioni”, shprehet më tej Margariti.
Pas largimit të mëhershëm të Mateo Dervishajt, gjatë këtyre ditëve Hysa është pushuar nga puna, ndërsa të tjerë aktorë e kanë të paqartë situatën e tyre.
Discussion about this post