Gjykata Kushtetuese ka pranuar kërkesën e mazhorancës dhe vendosi sot të kalojë në seancë Plenare, vendimin e depozituar nga Kuvendi për shkarkimin e Presidentit të Republikës Ilir Meta.
Lajmin e ka bërë të ditur vetë Gjykata përmes një njoftimi publik ku edhe pse nuk ka vendosur një datë të caktuar, ka treguar se do të shqyrtohet në një seancë vendimi nr.55/2021, datë 09.06.2021 “Për shkarkimin e Presidentit të Republikës së Shqipërisë për shkelje të rënda të Kushtetutës”.
Ky vendim i është dërguar Gjykatës Kushtetuese me shkresën nr.1368 prot., datë 14.06.2021 të Kuvendit të Shqipërisë dhe është regjistruar në këtë gjykatë në datën 14.06.2021, me numër të Regjistrit Themeltar 6 (K) 2021.
Në njoftim sqarohet se, gjykata e ka marrë në shqyrtim paraprak këtë çështje në përputhje me afatet procedurale të parashikuara në ligjin e saj organik dhe në Rregulloren e Brendshme, ndërkohë që veprimtaria e saj për shqyrtimin e të gjitha çështjeve ka qenë e pezulluar për periudhën 1 gusht 2021 deri në 10 shtator 2021, e cila përkon me lejen vjetore të gjyqtarëve.
