Shkëmbi flet pas humbjes: Në futboll gjërat zgjidhen me merkato, ose ikën trajneri

Trajneri i Dinamos, Bledi Shkëmbi tha se momenti jo i mirë psikologjik dhe mungesa e eksperiencës bëri që ekipi të gabonte në derbin përballë Partizanit. Trajneri i bluve u shpreh se grupi është i kmirë dhe nuk ka asnjë problem me njëri-tjetrin, por ndoshta do më shumë kohë për t’u bërë ashtu siç do ai.

Ai u ndal edhe te situata e tij në ekip dhe tha se në futboll gjërat zgjidhen ose duke bërë merkato, ose duke u larguar trajneri.

“Vazhdojmë të gabojmë e të luajmë këto ndeshje të njëpasnjëshme jo të mira. E nisëm mirë, pastaj kundërshtari na vuri në vështirësi. Pati momentet e veta të shënonte, ashtu siç patëm ne mundësi me Mihanën. Pjesa e dytë ishte deri diku e barabartë, patëm momente për të shënuar dhe nuk ia dolëm dhe këto rastet e humbura. Mendonim se nëse do të shënonim të parët do të kalonim momentin psikologjik por për fat të keq nuk ia dolëm.

Skuka nuk bëri në pjesën e parë ato detyra që i kishim caktuar, ndaj zëvendësimi ishte vendimi im.

Mungesa e eksperiencës dhe momenti jo i mirë psikologjik bëri që të gabojmë.

Mendoj se është një grup i mirë ku nuk ka asnjë problem me njëri-tjetrin. Është normale që nuk jemi një grup i fortë që në momente të vështira të jetë ai i grup që t’i kalojë. Nuk dua të keqkuptohem, grupi nuk ka probleme me njëri-tjetrin, por ndoshta na duhet më shumë kohë për t’u bërë një grup siç e e mendoni dhe siç e dua edhe unë. Një grup i fortë që në momente të vështira të arrijë të nxjerrë skuadrën nga presioni.

Nuk mendoj se neglizhojnë ndaj njëri-tjetrit futbollistët. Por në këto situata është e vetmja mënyrë që çdo futbollist duhet të japë mbi 100% për të kaluar këtë moment të vështirë.

Në futboll gjërat zgjidhen ose me merkato ose ikën trajneri. Janë edhe dy ndeshje që besoj se mund të bëjmë mirë se mendoj se në ekip ka burra. Por ndoshta në këtë moment po e vuajnë më shumë se sa duhet.

Merkato? Nuk është moment për të thënë emra e kush do të largohet. Kemi edhe dy ndeshje shumë-shumë të vështira, në futboll vetëm duke fituar ndeshjen e radhës mund të rikuperosh diçka nga situata në të cilën jemi”, tha Shkëmbi.