Bullgaria do të vazhdojë të mbajë qëndrim mohues sa i takon procesit të Integrimit të Shqipërisë dhe Maqedonisë së Veriut. Deklarata vjen nga presidenti i rikonfirmuar në detyrë Rumen Radev, i cili ka folur shkurtimisht pas fitores së mandatit të dytë duke thënë:
“Qeveria e re nuk duhet të bëjë lëshime nga pozitat nacionale posaçërisht kur bëhet fjalë identiteti dhe historia bullgare dhe të drejtat e bashkatdhetarëve tanë prapa kufirit”.
Ish-kryeministri bullgar dhe lider i “GERB”-it, Bojko Borisov e akuzoi presidentin e sapo zgjedhur në një mandat të dytë Rumen Radev, se vetëm për një javë ka arritur t’i prishë marrëdhëniet me të gjithë fqinjët e saj, por edhe Shqipërinë.
“Nga vendi më i preferuar në Ballkan Bullgaria tashmë i ka marrëdhëniet e prishura me të gjitha vendet fqinje dhe urrehet me Maqedoninë e Veriut dhe Shqipërinë, urrehet me Turqinë dhe ekziston rrezik real për konflikt etnik dhe rrezik prej emigrantëve ilegalë” tha ai.
Por kryeministri i Maqedonisë së Veriut, Zoran Zaev nëpërmjet një shkrimi në “Facebook”, ka njoftuar se e ka telefonuar Rumen Radev për zgjedhjen e sërishme si president i Bullgarisë.
Zaev bëri të ditur se në bisedën telefonike me Radevin janë dakorduar që të vazhdojnë dialogun mes dy vendeve për gjetjen e një zgjidhje të përbashkët evropiane.
“Ramë dakord që Bullgaria dhe Maqedonia e Veriut të vazhdojnë nëpërmjet dialogut dhe kuptimit të ndërsjellë të gjejnë zgjidhje në emër të ardhmërisë së përbashkët evropiane”, u shpreh Zaev.
Shkupi dhe Tirana pasohen me një ndryshim kursi për heqjen e vetos që po mban peng zhvillimin e konferencës së parë ndërqeveritare, pasi rrugëtimi për dy vendet është konceptuar në bllok.
Fillimisht ideja e ndarjes së Shqipërisë nga Maqedonia e Veriut u la e hapur, por disa shtete të BE-së u shprehën kundër pasi sipas tyre vendimi do të jepte sinjal negativ për rajonin.
Megjithatë pavarësisht deklaratës së Presidentit të sapo zgjedhur në mandatin e dytë, fjalën e fundit e ka qeveria e re bullgare që pritet që të formohet.
Discussion about this post