Një shpërthim tritoli u regjistrua mëngjesin e kësaj të premte në kryeqytet. Siç bënë me dije blutë më herët, ngjarja u regjistrua rreth orës 03:45 të mëngjesit të sotëm, ku në lokalin në pronësi të shtetasit Arbër Sinani, dyshohet se plasi një sasi e vogël lënde plasëse, e cila ishte vendosur në hyrje të biznesit të tij.
Teksa grupi hetimor është duke punuar për zbardhjen e plotë të kësaj ngjarje, vetë Sinani ka deklaruar nga polici se nuk ka dijeni se kush mund ta ketë bërë dhe se nuk ka pasur konflikt me asnjë.
Madje në vendin tonë ky shtetas rezulton të jetë “i pastër” dhe se nuk ka asnjë precedent penal, ndërkohë që burime për mediat bëjnë me dije se prej disa kohësh ai ka jetuar në Gjermani ku dhe dyshohet se mund të ketë qenë i përfshirë në aktivitet ilegal me lëndë narkotike.
Sipas të njëjtave burime thuhet se kjo ngjarje mund të ketë ardhur si “paralajmërim” për Sinanin për shkak të “pazareve të drogës”.
Policia ka sekuestruar kamerat e bizneseve përreth me qëllim për të zbardhur këtë ngjarje, ndërkohë që vlen të theksohet se dy kamerat e sigurisë në subjektin e Sinanin nuk janë të pajisura me DVR, gjë e cila nuk ndihmon hetuesit.
“Rreth orës 03:45, në Rrugën e Durrësit, në lokalin në pronësi të shtetasit A. S., dyshohet se ka plasur një sasi e vogël lënde plasëse, e vendosur pranë derës hyrëse të lokalit.
Si pasojë janë shkaktuar vetëm dëme materiale. Nuk ka persona të lënduar. Grupi hetimor po vijon punën për identifikimin dhe kapjen e autorit/autorëve, si dhe për zbardhjen e plotë të rrethanave të ngjarjes”, njoftoi Policia më herët.
Discussion about this post