Një shpërthim me lëndë plasëse ka ndodhur orët e para të mëngjesit, në Rrashbull të Durrësit. Nga ngjarja nuk raportohet për persona të lënduar, por janë shkaktuar dëme materiale.
Lënda plasëse, sipas bluve, u vendos në ambientet e jashtme të mobilierisë “Luart Mobileri” në pronësi të 36-vjeçarit Artan Alla.
“Në orët e para të mëngjesit, në Rrashbull, Durrës, në ambientet e jashtme të mobilierisë në pronësi të shtetasit L.A., 36 vjeç, është hedhur një sasi lënde e dyshuar plasëse. Si pasojë janë shkaktuar vetëm dëme materiale”, njoftoi policia.
Nga veprimet e para hetimore, shtuan të njëjtat burime, dyshohet se lënda plasëse është hedhur për shkak të një konflikti për motive pronësie.
Në Drejtorinë Vendore të Policisë Durrës janë shoqëruar 3 persona që dyshohen nga policia se kanë dijeni për rastin.
Nga pamjet e sjella nga vendngjarja shihen xhamat përtokë që janë thyer për shkak të shpërthimit.
Banorët e zonës shprehen se janë trembur nga shpërthimi i fortë.
“E dëgjuam në orën 4. Bombë ku e di unë ca ishte. U trembëm”, thotë një banore.
Biznesi ku ndodhi shpërthimi është i pajisur edhe me kamera sigurie që mund të ndihmojnë në zbardhjen e dinamikës së ngjarjes dhe identifikimin e autorëve.
Lexo edhe: Durrës/ Pronari i biznesit që iu vu tritol përgënjeshtron policinë
Discussion about this post