Një shpërthim i fuqishëm ka ndodhur në orët e para të mëngjesit të kësaj të marte në një fabrikë eksplozivësh në fshatin Kavakli, në provincën e Balikesir, në Turqinë veriperëndimore. Ngjarja ka shkaktuar 12 viktima dhe ka plagosur katër persona, sipas autoriteteve.
Ministri i Brendshëm, Ali Yerlikaya, njoftoi se një hetim i plotë ka nisur për të zbuluar shkakun e shpërthimit, ndërsa guvernatori i Balikesir, Ismail Ustaoglu, konfirmoi bilancin tragjik: “Sipas raporteve fillestare, 12 punonjës kanë humbur jetën dhe katër të tjerë janë dërguar në spital me lëndime. Uroj mëshirën e Zotit për viktimat dhe shërim të shpejtë për të plagosurit.”
Pamjet nga vendngjarja, të transmetuara nga mediat lokale, treguan rrënoja dhe fragmente metali të shpërndara jashtë uzinës, ndërsa ambulancat dhe ekipet e emergjencës punonin në terren. Zjarrfikësit u angazhuan për të neutralizuar flakët, ndërkohë që autoritetet lokale raportuan se një pjesë e ndërtesës është shembur nga shpërthimi.
Ministri Yerlikaya theksoi se, deri më tani, shkaku i shpërthimit mbetet i paqartë, por përjashtoi mundësinë e sabotimit.
“Ne po përpiqemi të zbulojmë se çfarë e shkaktoi këtë tragjedi,” tha ai.
Sipas raportimeve, shpërthimi ndodhi në një sektor të fabrikës që prodhon municione dhe eksplozivë të destinuara për tregjet e brendshme dhe ndërkombëtare. Gjendja e të plagosurve raportohet jashtë rrezikut për jetën.
Fabrika ku ndodhi shpërthimi është pjesë e industrisë së mbrojtjes turke, një sektor në zhvillim të shpejtë, veçanërisht në prodhimin e dronëve dhe municioneve. Presidenti Recep Tayyip Erdogan ka qenë një përkrahës i madh i kësaj industrie, duke e shndërruar Turqinë në një eksportues kryesor të produkteve të mbrojtjes.
Discussion about this post