Dy ditë më parë Lushnja u trondit nga një shpërthim, ku humbën jetën dy persona (babë e bir), si dhe u plagosën 7 persona të tjerë, mes të cilëve edhe deputeti socialist Bujar Çela. Shpërthimi ndodhi në një magazinë në ndërtim, në pronësi të deputetit, ndërsa nga hetimet e deritanishme ka rezultuar se shkak për ngjarjen e rëndë u bë plasja e një bombule oksigjeni që përdorej për saldimin e hekurave.
Hetimet lidhur me ngjarjen vijojnë nga Prokuroria e Fierit, ndërsa një prej të plagosurve Sokol Lumi, vijon të jetë në kujdesin intensiv. Të plagosurit e tjerë, përfshi edhe deputetit Bujar Çela janë në gjendje të mirë shëndetësore dhe jashtë rrezikut për jetën.
Nga shpërthimi i së premtes humbën jetën babai dhe i biri, Roland dhe Elidon Hoxha, që ndodheshin në vinçin që po bënte zhvendosjen e bombulave të oksigjenit. Ronaldi Hoxha humbi jetën në vendin e ngjarjes, ndërsa djali i tij, pak orë më pas teksa transportohej drejt Traumës.
Hetimet pritet të zbardhin shkakun e shpërthimit, pasi fillimisht u tha se ai ishte shkaktuar pasi vinçi preku linjën e tensionit të lartë. Ndërkohë varianti tjetër është ai i rënies nga vinçi të bombulës së oksigjentit që shkaktoi shpërthimin. Por në të dyja rastet duket se nuk janë respektuar rregullat e sigurisë në punë, të cilat mund të kishin shmangur tragjedinë.
Discussion about this post