Robert Neçaj, është djali i ri i cili shmangu një tragjedi para disa ditësh duke shpëtuar nga mbytja dy shtetas nga Kosova, në Shëngjin. President i Federatës shqiptare “Vrojtuesit e plazhit”, Erdit Gega u shpreh se Neçaj arriti t’i nxjerrë të gjallë në breg të detit, por vetë pësoi dëmtime të rënda. Ai has vështirësi në frymëmarrje për shkak të lëndimeve në mushkri.
“Ngjarja ka qenë shumë e rëndë. Djali i rrezikuar ka pasur kriza epileptike në ujë dhe e motra, që ka qenë pranë ka shfaqur momente paniku. Robertit i është dashur t’i shpëtojë të dy. Sigurisht që është e vështirë të dalloj simpotmat dhe gjithë rrjedhshmërinë e ngjarjes. I ka dhënë jelekun e shpëtimit vajzës, vajza nga paniku e ka goditur në kokë, por arriti t’i nxjerrë të dy dhe ti nxjerrë në breg. Shmangu një tragjedi që ndoshta do kishte zënë vendin e parë të media nëse do të kishte ndodhur, por falë zotit Robeti u gjend aty në vendin e duhur” – u shpreh Erdit Gega, president i Federatës shqiptare “ Vrojtuesit e plazhit”.
Edhe pse ka bërë thjesht detyrën, Erditi, shpresonte që të paktën dikush të interesohej për Robertin. Madje ai i tërheq vëmendjen edhe mediave.
“Janë të rralla rastet kur të rrezikuarit kthehen dhe na falënderojnë, për ndërhyrjen për punën që bëjmë. Vendet e zhvilluara e ushqejnë masën, publikun me këto profesione. Në Shqipëri për fat të keq akoma nuk e kemi këtë kulturë, mediat akoma nuk kanë arritur të kthejnë kursin, ta edukojnë masën publikun, me dashurinë për këto profesione, me respektin që duhet” – tha ai më tej.
Në Shqipëri janë rreth 1200 vrojtues plazhi, në ndihmë të pushuesve.
Discussion about this post