UEFA i ka kushtuar një reportazh trajnerit Sylvinho, i cili është vetëm një hap larg kualifikimit me Shqipërinë në finalet e Euro 2024.
Ata e kanë ndjekur gjatë punës së përditshme te kuqezinjtë nga diskutimet me stafin e tij, seancat stërvitore apo emocionet që përcjell ndeshja.
“E di që të përfaqësosh një shtet hyn në zemrën e të gjithë njerëzve të atij vendi. Ti e di që ke shumë përgjegjësi për të luajtur me shpirt dhe zemër, sepse përfaqësojmë një vend. Tifozët të cilët vijnë në stadium duan ta shikojnë këtë”, shprehet Sylvinho.
UEFA përmend ndeshjen e së premtes me Moldavinë në Kishinjev si tepër të rëndësishme.
Sylvinho i emëruar në Janar po bën mrekullinë duke qenë pranë pjesëmarrjes së dytë të Shqipërisë në një turne të rëndësishëm pas Europianit të 2016 në Francë.
Puna e tij vlerësohet edhe nga futbollistët e Kombëtares.
“Është një trajner që po na jep shumë, pasi është tepër energjik. Kemi patur shumë nevojë”, tha Hysaj. Mbrojtësi ‘veteran’ i kuqezinjve, duke folur me superlativa për trajnerin brazilian, duke e përfshirë atë në grupin e më të preferuarve, shpjegon edhe si e ndryshoi Sylvinho atmosferën në grupin e futbollistëve të Kombëtares.
“E ndjek shumë, pasi është një trajner që na ka dhënë shumë dhe po na ndihmon gjithmonë. Është shumë energjik dhe na jep shumë pozitivitet si grup. Kishim shumë nevojë për këtë, pasi kemi pasur disa kohë kur nuk kishim shumë atmosferë pozitive si skuadër dhe kishim nevojë për njerëz si Sylvinho. Tani është padyshim një nga trajnerët më të preferuar të mi”, shprehet Hysaj.
Mbrojtësi shkodran nuk ngurron të pyesë trajnerin edhe për evolucionin e rolit të mbrojtësit të krahut, por edhe ndryshimin mes tij dhe vetë Sylvinhos, që në karrierën si futbollist ka luajtur pikërisht si mbrojtës i majtë.
“Ka ndryshuar disi, pasi dikur nuk ishte aq taktik. Sot ka shumë taktikë në mënyrën e interpretimit të këtij roli. Lëviz, futu brenda, largoje topin jashtë zonës, mos e lër të afrohet këtu, e të tjera këshilla taktike. Sigurisht taktik është e rëndësishme, por atëherë ishte më shumë një lojë kombinimesh. Ti je shumë më agresiv dhe shumë më i fortë fizikisht. Në duelet një kundër një je shumë më mirë, pasi unë nuk i preferoja shumë”, shprehet Sylvinho.
UEFA kujton edhe karrierën e Sylvinho ku ka fituar shumë trofe përfshi 2 herë Champions League.
Discussion about this post