Kryeministri Edi Rama ka reaguar pas mbylljes së procesit të votimeve. Në një deklaratë për shtyp nga selia rozë, Rama falenderoi patronazhistët për punën e bërë në këto zgjedhje, dhe sipas tij, ata e dinë më mirë se kush do të jetë fituesi.
Ndër të tjera, kryeministri i bëri thirrje qytetarëve të mos dëgjojnë sondazhet, por të presin rezultatin final.
“Populli ka folur, tani do të dëgjojmë popullin, detyra e cdo numëruesi, e cdo vëzhguesi është që numërimi të jetë me përgjegjësi të lartë qytetare dhe ligjore dhe te kontribuojë për të numëruar në mënyre korrekte votat, jo me hamendje ndaj exit polleve, pavarësisht faktit qe ne na japin forcë qeverisëse, i përkasin parashikimeve para ndeshjes.
Tani është rezultati i të gjitha kutive të votimit që është rezultati i ndeshjes. Ju lutem të gjithëve përqëndrohuni në detyrën tuaj.
Dua të përsëris atë që tha Bora, një falenderim nga zemra për të gjithë patronazhistët që kanë bërë një punë mbreslënëse, ata e dinë më mirë se gjithë të tjerët se kush voton, dhe janë të bindur për rezultatin e punës. Tani është momenti që të pushojnë, të ndjekin nga shtëpia procesin dhe nesër Shqipëria do të buzëqeshë serish.
Ajo që dua të them tjetër, është se ne nuk duam thjesht rezultate dhe konfirmimin si forcë qeverisëse, por duam që kështu si kjo ditë e bukur, të jetë edhe vazhdimit i këtij procesi dhe të dalë e fituar Shqipëria dhe jo vetëm partia që do vazhdojë të qeverisë këtë vend”, tha Rama.
