Deputeti shqiptar në Parlamentin e Serbisë, Shaip Kamberi, ka deklaruar ditën e sotme se shqiptarët e Luginës së Preshevës vazhdojnë të diskriminohen në Serbi dhe ky është një shqetësim që duhet të ngrihet. Sipas tij, integrimi i këtij komuniteti nuk është zhvilluar dhe programi i Serbisë ka mbetur në letër.
“Shqiptarët janë të diskriminuar në sfera të ndryshme të jetës. Mohimi i integrimit të barabartë në institucionet e shtetit, përdorimit të lirë dhe zyrtarë të gjuhës në intitucionet e shtetit, pra integrimit si një proces që fare nuk është zhvilluar, pavarësisht faktit se Serbia me tre programe dhe me tre marrëveshjet që ka me shqiptarët është zotuar se do ta kryejë këtë. Është pra një ndër problemet kryesore me të cilin ballafaqohen shqiptarët”, tha ai gjatë një interviste.
Deputeti Kamberi foli edhe për nismën “Ballkani i Hapur” për të cilën u shpreh se, pa pjesëmarrjen e të gjithë shteteve, Ballkani do të vazhdojë të mbetet një rajon i trazuar. Madje, sipas tij, kjo nismë do i jap mbështetje Serbisë dhe Lugina e Preshevës do shkojë drejt shpopullimit. “Serbia, vazhdon t’i mohojë shqiptarëve të drejtën e përdorimit të simbolit kombëtar, ndërkohë që mban peng zhvillimin ekonomik të tre komunave në Luginën e Preshevës duke ndikuar në një shpopullim të qetë nga pjesa vitale e popullsisë shqiptare.
Për momentin ne nuk jemi duke parë ndonjë lëvizje pozitive dhe ndryshim të raportit të qasjes së Serbisë ndaj shqiptarëve në Luginë të Preshevës. T’i japim kohë, të presim, se ndoshta mund të ketë diçka. Nëse nuk ka lëvizje në atë drejtim, për shqiptarët e Luginës së Preshevës mund të jetë një iniciativë e kotë”, tha ai.
Deputeti Kamberi tha se për të qenë një nisëm e kompletuar, “Ballkani i hapur” duhet të përfshijë të gjithë vendet e këtij rajoni dhe jo, si deri tani, që nismës i mungojnë tre apo katër shtete. I pyetur rreth pozicionit të tij si deputet shqiptar në Parlamentin e Serbisë, zoti Kamberi tha se është i vendosur të flasë për të vërtetën e shqiptarëve në Serbi dhe atë të Kosovës.
