Është shtyrë sërish vendimi për ish-ministrin e Mbrojtjes, Fatmir Mediu në Gjykatën e Posaçme të Apelit. Mësohet se shkak për shtyrjen është bërë mos njoftimi i ish-ministrit për seancën që do të shqyrtohej në dhomë këshillimi, duke e shtyrë për më 24 shtator.
“Me referimin në parashikimin e pikës 1, shkronja b), të nenit 46 të ligjit 98/2016 si dhe, në interesin e treguar nga media, komunikohet në mënyrë të përmbledhur se, sot më datë 17.09.2021, ora 10:00, në Gjykatën e Posaçme të Apelit për Korrupsionin dhe Krimin e Organizuar, ishte planifikuar për t`u shqyrtuar në dhomë këshillimi çështja me nr. 212 akti, datë regjistrimi 03.09.2021, mbi ankimin e Prokurorit të Posaçëm dhe trashëgimtarëve të viktimës E.D., seancë e cila, sipas nenit 427/a pika 4 të K.Pr.Penale, u shty për të vijuar më datë 24.09.2021, ora 10:00, për shkak se njëra prej palëve, konkretisht z. F.M. nuk ka marrë dijeni rregullisht,” njofton gjykata.
Gjykata e Posaçme vendosi më herët pushimin e hetimeve për ish-ministrin e Mbrojtjes në lidhje me shpërthimin në Gërdec, por ky vendim u ankimua në Apel nga SPAK. Në një vendim prej 28 faqesh, gjyqtari Erjon Çela rrëzoi pretendimet e SPAK që sipas tij nuk ka paraqitur asnjë provë të re dhe ka shigjetur prokurorinë ndër vite që nuk ka kryer hetime ndaj Mediut.
Ish-ministri akuzohet për shpërdorim detyre dhe tani është Gjykata e Posaçme e Apelit që po shqyrton kërkesën e SPAK për rinisje të hetimit ndaj tij.
Vetë Mediu, i cili është pjesë e Kuvendit pasi fitoi mandatin në 25 Prill, i ka mohuar vazhdimisht akuzat për përfshirjen e tij në çështjen “Gërdeci”. Shpërthimi në Gërdec ndodhi më 15 mars, 2008 në një “fabrikë” për demontimin e armëve, ku humbën jetën 26 persona dhe u plagosën qindra të tjera.
Familjarët e 26 viktimave që humbën jetën nga shpërthimi i municioneve kanë kërkuar vazhdimisht hetimin dhe dënimin e tij, ndërsa janë shprehur se çështja do të shkojë deri në gjykatën e Hagës.
