Dita e djeshme, për shkollën “Andon Zako Çajupi”, ishte një “fushëbetejë” midis mësuesve dhe nxënësve. Ndonëse ngjarja në vetvete ishte shumë e rëndë dhe tronditëse, pasi u përdorën sende të forta si karrige, tavolina, por edhe armë, mediet sociale vendosën të ironizojnë të gjithë situatën duke e kthyer këtë episod të rëndomtë në një “meme”.
Në fakt nuk është një ngjarje e lehtë për t’u “gëlltitur”, pasi në konflikt janë përfshirë 7 persona, 4 prej të cilëve janë të lënduar, ndërkohë që u mësua se policia shoqëroi 5 persona në komisariat.
Zanafilla e kësaj historie zë rrënjë në një debat mes dy mësueseve, i ndodhur ditën e premte, konkretisht Elida Qenami mësuese Letërsie dhe mësuesja e Historisë me iniciale Domenika Toptani. Bazuar në një deklaratë, mësuesja e Letërsisë kishte lajmëruar të afërmit e saj, ku këta të fundit erdhën të armatosur, duke mos e lënë mësuesen e Historisë të shkonte në mësim. Debati mes të dyja palëve ka degjeneruar deri në përdorimin e sendeve të forta dhe armës, nga ku mbeti i plagosur një 32-vjeçar.
Kjo ngjarje, vë në pikëpyetje rolin primar të vetë shkollës dhe jo vetëm sigurinë që institucioni duhet të ketë për të rinjtë, por edhe dija ose edukata që paraqet për ta.
Është gjë tjetër kur të rinjtë përfshihen në një sherr, por është komplet ndryshe kur dy mësues dhe adult të cilët supozohet të jenë shtylla që mbajnë peshën për mendësinë e të rinjve, të degradojnë gjendjen deri në atë pikë sa të “shkundin” të gjithë qytetin dhe banorët përreth zonës me të shtëna armësh. Në një orar kur shumica e nxënësve janë të ulur në bangat e shkollës, dy arsimtare, të “ngarkuara” me misionin e “shenjtë” e mësimit dhe edukimit dhanë shembullin më të keq se si mund të zgjidhet një mosmarrëveshje.
Dhe këtu vjen pyetja, a janë këta persona që duhet të edukojnë breza të tërë shembulli më i mirë për të rinjtë shqiptar? Sa po promovohet mirëkuptimi dhe komunikimi kur të tilla rastesh paraqiten në ditët e sotme? A janë vetëm mësuesit problemi? Apo faktorë luajnë edhe prindërit bashkë me miqtë për edukatën e keqe që tregon vazhdimisht rinia e sotme?
Ndonëse me nota satire dhe humori, këto “meme” që vërshuan në internet, ilustrojnë fatkeqësisht imazhin më të errët të arsimit duke treguar kështu gjendjen aktuale në të cilën ndodhemi. / O.B Gijotina.com /
