Aeroportet ndërkombëtare të Damaskut dhe Halepit të Sirisë u mbyllën, ndërsa dy punëtorë janë vrarë nga një sulm me raketa i nisur nga Izraeli herët në mëngjes, njoftuan mediat shtetërore siriane, duke cituar një burim ushtarak.
“Përafërsisht në orën 05:25, armiku izraelit nisi një sulm ajror duke synuar aeroportet ndërkombëtare të Damaskut dhe Alepos, duke vrarë dy punëtorë në aeroportin e Damaskut”, tha burimi ushtarak.
Burimi foli për sulme “të njëkohshme” që erdhën “nga Mesdheu, perëndimi i Latakisë dhe nga Golani i pushtuar sirian“.
Fluturimet e planifikuara për në dhe nga dy aeroportet janë duke u devijuar në aeroportin e Latakias, tha Ministria siriane e Transportit.
Kjo është hera e dytë që nga fillimi i luftës mes Izraelit dhe Hamasit më 7 tetor, që dy aeroportet goditen njëkohësisht.
Më 12 tetor, sulmet kishin lënë jashtë funksionit sërish aeroportet e Damaskut dhe Halepit.
Për më tepër, fundjavën e kaluar sulmet ajrore izraelite shënjestruan aeroportin e Alepos, duke plagosur pesë persona, sipas Observatorit Sirian për të Drejtat e Njeriut, ndërsa autoritetet siriane treguan se aeroporti ishte mbyllur.
Izraeli ka kryer qindra sulme ajrore kundër tokës siriane që nga shpërthimi i luftës civile në vend në vitin 2011.
Forcat Ajrore izraelite synojnë kryesisht pozicione të forcave të mbështetura nga Irani dhe Hezbollahu libanez, aleatë të Damaskut dhe armiq të Izraelit, por edhe të ushtrisë siriane.
Discussion about this post