Ambasadori i Francës në Kosovë, Olivier Guerot ka reaguar gjatë mesnatës në lidhje me tensionet e krijuara në veri pas tërheqjes së Listës Serbe nga institucionet e vendit. Në një postim në Twitter, Guerot është shprehur se tani është momenti që të gjithë të përmbahen dhe të veprojnë me qetësi dhe përgjegjësi për të evituar agravimin e situatës.
“Tani është koha që të gjithë të ushtrojnë përmbajtje dhe përgjegjësi”, ka shkruar ambasadori francez.
Lexo edhe: Ç’po ndodh në Kosovë? Njësia Speciale niset për Mitrovicë
Guerot ka shpërndarë gjithashtu deklaratën e lëshuar më herët të Përfaqësuesit të Lartë të Bashkimit Europian, Josep Borrell.
Kreu i Listës Serbe Goran Rakiç ka vendosur që të dalë nga institucionet e Republikës së Kosovës. Ky vendim ka ardhur pas takimit që kanë mbajtur me të gjithë ata që punojnë në institucionet e Republikës së Kosovës në veri. Serbët këtë vendim e kanë marrë si shenjë revolte ndaj vendimit të kryeministrit Kurti për targat dhe për vendimin për pezullimin e drejtorit rajonal të Policisë në veri, Nenad Gjuriç.
Përfaqësuesi i Lartë i BE-së, Joseph Borrell ka telefonuar mbrëmë kryeministrin e Kosovës Albin Kurti dhe presidentin serb Aleksandër Vuçiç në lidhje me situatën e tensionuar në Mitrovicë. Pas telefonatave, Borrell ka publikuar një deklaratë në të cilën i bën thirrje të dyja palëve që të përmbahen nga çdo veprim i pakoordinuar i cili mund të tensionojë situatën më tej.
Discussion about this post