Kur T.P., përfundoi në policinë e Kamzës, duke mbajtur plagët me dorë, policët ndoqën vazhdën e gjakut të saj për të shkuar në banesë, ku dhe ndaluan e arrestuan 74-vjeçarin N.P., në marrëdhënie bashkëshortore me të plagosurën rëndë. Por me kalimin e ditëve, prokuroria nuk arriti dot ta vërtetonte se bëhej fjalë për tentativë vrasjeje ndaj dhe e akuzoi të moshuarin vetëm për dhunë në familje.
Gjithë historiku i gruas së plagosur që ngriti dorën për t’u mbrojtur që kërkoi ndihmë dhe që shpëtoi prej agresorit falë mrekullisë, tregohet për Gazetasi.al nga të afërm të gruas, që kanë vënë në dispozicion fashikujt dhe veprimet e institutit të Mjekësisë Ligjore, e cila pas ekspertizës skandaloze që liroi vrasësin Elton Metaj, që më pas vrau Sabrina Bengën në Fier, ka lehtësuar dukshëm pozitën e një tjetër burri.
Në këtë fashikull jepen detaje mbi procedurat që ndiqen dhe që ngecin në zinxhirin e drejtësisë dhe veçanërisht me gabimet që kryejnë ekspertët. Në këtë rast, një përgjigje në dukje rutinë e ekspertit, që thotë se thika nuk i përmbush kushtet për të vrarë, ka lehtësuar dukshëm pozitën e të akuzuarit.
Gruaja e pyetur në polici, thotë se i shoqi tentoi ta vrasë, pasi e goditi disa herë me thikën e kuzhinës dhe dëshmitarja, sipas burimeve të Gazetasi.al, riprodhoi të njëjtat deklarata si ato përpara prokurorit dhe gjatë kallëzimit penal. Në fashikull, përshkruhet se “rreth orës 10:30, në Komisariatin e Policisë nr.5, është paraqitur e mbuluar me gjak shtetësja T.P., që mbante në dorë një thikë dhe ka deklaruar se ishte goditur nga bashkëshorti i saj, i pandehuri N.P.
Në kushtet kur viktima ishte me plagosje dhe gjakderdhje të dukshme plage me thikë në bark, krahë dhe këmbë, është dërguar në Spitalin Universitar të Traumës Tiranë për mjekim”.
Çdo gjë tjetër tregohet nga veprimet që kreu policia
“Këqyrja e banesës tregoi për vija gjaku që ishin të shpërndara nëpër apartament, nga kuzhina në korridor, nëpër shkallët e pallatit e deri në dalje nga godina. Gjurmët e gjakut u fiksuan dhe mostra prej tyre u morën për ekspertime të mëtejshme biologjike. Tabela fotografike, nr.2144/2020 regj, date 28.08.2020, tregon pamjet e vendit te ngjarjes dhe faktin që gjurmët e gjakut vijojnë nga brenda banesës, nëpër shkallë e deri në hyrje të pallatit. Kjo përputhet me rrugën e ndjekur nga viktima gjatë largimit nga agresori e deri në polici”, – thotë oficeri i policisë.
Pikërisht lojërat me drejtësinë nisin nga ekspertizat e kryera pranë Mjekësisë Ligjore, tha një burim i sigurt i Gazetasi.al, që hetoi dhe shqyrtoi këtë dosje.
“Eksperti arrin në përfundimin që “thika objekt ekspertimi, e përdorur nga autori i moshës 74 vjeç, ditën e ngjarjes nuk i përmbush kushtet teknike për t’u cilësuar si armë e ftohtë me teh (prerëse, shpuese). Ajo është thikë kuzhine”.
Mjekësia Ligjore vijon me përshkrimin e plagëve të shkaktuara në trupin e gruas, që janë një skandal i vërtetë, duke treguar se plagët ishin në bark, parakrah dhe në këmbë.
“Këto janë shkaktuar me “mjet prerës me majë të mprehtë, siç është dhe thika”. “Dëmtimet nuk kanë qenë të rrezikshme për jetën në çastin e shkaktimit të tyre dhe, si të tilla, hyjnë në kategorinë e atyre dëmtimeve që kanë sjellë për pasoje humbjen e përkohshme të aftësisë për punë në masën mbi nëntë ditë”.
I njëjti institucion, i deklaron plagët si humbje e përkohshme e të plagosurës për të mos shkuar në punë, megjithëse pranon se plagët ishin tejshpuese dhe të shkaktuara nga një thikë. Por njëherazi, gjithë veprimet e autorit, u konsideruan prej të njëjtit institut, si humbje e ekuilibrit mendor thënë ndryshe gjaknxehtësi. Gruaja e plagosur, tregon në dosjen e saj, se ishte martuar që 15 vjeçe me shkuesi dhe se marrëdhënia e saj martesore, ka qenë përherë e trazuar dhe me dhunë.
Në këto kushte, prokurori i hetimit e ka dorëzuar si dhunë në familje çështjen e plagosjes së gruas, pa qenë në gjendje të vërtetojë akuzën e ngritur në fillim, atë të vrasjes për shkak të marrëdhënieve familjare të mbetur në tentativë. Dhe e gjitha kjo, vetëm për shkak të armës që u përdor, që ekspertët e përcaktojnë se nuk të vret, pasi është thikë kuzhine./ Gazeta “Si”
Discussion about this post