Rritja e çmimit të energjisë elektrike me vendin tonë nuk ka të bëjë me krizën energjetike që pritet të përfshijë shumë vende. Kompanitë e transmetimit dhe shpërndarjes së energjisë elektrike kanë firmosur rritjen e tarifave që nga fundi i vitit që lamë pas. Po ashtu aplikimi i OSHEE është në proces dhe është kthyer për plotësime nga Enti Rregullator i Energjisë. Këto dokumente tregojnë se kryeministri Rama po shfrytëzon situatën botërore për të përligjur skemën e rritjes së tarifave të energjisë elektrike.
Aplikimet
Në 2020 pranë ERE janë depozituar disa kërkesa nga kompanitë shtetërore që kanë aplikuar për përcaktimin e çmimeve të energjisë elektrike për 2021.
Konkretisht, Operatori i Sistemit të Transmetimit me 24.09.2020 ka dërguar një aplikim ku kërkon rritje të kostove me 1.2 miliard lekë. “Kostot e sigurimit të shërbimeve ndihmëse, parashikohet te kenë një rritje të konsiderueshme duke kapur vlerën rreth 1,2 miliardë Lekë. Ju lutemi marrjen në konsideratë të kësaj rritje, me efekt shumë të madh, në miratimin e tarifës së transmetimit për vitin 2021”, thuhet në aplikim.
OST kërkoi rritjen e tarifës së transmetimit të energjisë në 1.31 lekë/këh nga 0.75 lekë/këh që është aktualisht. Në atë kohë ERE vendosi të mos fillonte procedurën e shqyrtimit të aplikimit për shkak të mos argumentimit nga ana e OST mbi nevojën e kësaj rritjeje. Ndërkohë që, në rast se sivjet do të ketë një ndryshim të kësaj tarife, ajo impakton drejtpërdrejt bizneset që kanë dalë në treg të lirë energjie, por edhe abonentët familjarë e biznese që furnizohen nga Furnizuesi i Shërbimit Universal, që është pjesë e OSHEE-së. Kjo tarifë është pjesë përbërëse e formulës për përllogaritjen e çmimit final të energjisë, që aplikohet nga FSHU për klientët e saj. Impakti është i njëjtë edhe në rast të miratimit të rritjes së tarifës së shpërndarjes së energjisë elektrike, një kërkesë që është bërë nga OSSH.
Dy muaj më vonë, në 23.11.2020 kompania Operatori i Sistemit të Shpërndarjes, gjithashtu ka kërkuar rritje të çmimit për shitjen e energjisë, gati më 2.5 lekë më shumë Kë/h.
“Lidhur me tarifat dhe çmimet e shitjes së Energjisë Elektrike në vitin 2021 propozojmë sa vijon: Tarifat sipas nivelit të tensionit të Operatorit të Sistemit të Shpërndarjes së energjisë elektrike për vitin 2021 të jenë si vijon: Tarifa e shpërndarjes së energjisë elektrike në tension 35 kv -3.70 Lekë/Këh b) Tarifa e shpërndarjes së energjisë elektrike në tension 0.6 -20 kv – 4.00 Lekë/Këh c) Tarifa e shpërndarjes se energjisë elektrike në tension 0.4 kv – 6.30 Lekë/Këh”, thuhet në kërkesë.
Dhe fill pas këtyre, edhe Furnizuesi i Shërbimit Universal me 20.12,2020 ka aplikuar që të mbajë tarifat e viteve 2014 për konsumatorët gjatë 2021, por tarifat e atyre viteve kanë qenë goxha të larta. Megjithatë është pranuar aplikimi i FSHU, e cila për vitin 2021 shet energjinë 5,127,835 lekë dhe në 2020 çmimi ishte 5,084,375, pra rritje më shumë se 4 milionë lekë.
Gjatë vitit 2020 Enti Rregullator i Energjisë zhvilloi edhe konsultime me grupet e interesit mbi tarifat e reja të kërkuara nga OST, por ato u ndërprenë për shkak të situatës së krijuar nga COVID-19, ndërkohë që tarifat u mbajtën të pandryshuara. Aktualisht OSSH-së i është kërkuar që të plotësojë aplikimin e saj me dokumentacion shtesë, ndërkohë që referuar procedurave standarde.
Paralelisht, në pritje është edhe aplikimi që do të kryhet nga Furnizuesi i Shërbimit Universal, për çmimin e shitjes me pakicë të energjisë për vitin 2022. Kryeministri Rama ka paralajmëruar se do përballemi me çmime marramendëse të energjisë elektrike. Por referuar aplikimeve mund të supozojmë se më e pakta është rritja deri në 50 për qind e çmimit të energjisë elektrike për konsumatorët familjarë dhe biznesin e vogël.
