Avokati i popullit ka reaguar pas skandalit të publikimit të listë-pagesave. Përmes një njoftimi zyrtar, Avokati i Popullit e cilëson të gjithë këtë një akt shqetësues, i cili prek drejtpërsëdrejti privatësinë e qytetarëve. Ndërsa thekson se ky skandal vë në dukje paaftësinë e institucioneve për ruajtjen e të dhënave.
“Avokati i popullit reagon mbi publikimin e paautorizuar të të dhënave sensitive të qytetarëve shqiptarë. Avokati i Popullit e konsideron shqetësues faktin e publikimit e paautorizuar të një baze të dhënash në të cilën ekspozohen detaje mbi pagat e punonjësve shqiptarë si dhe informacione të tjera sensitive.
Institucioni i Avokatit të Popullit tërheq vëmendjen për përsëritjen e këtyre publikimeve që cenojnë privatësinë dhe të drejtat e qytetarëve duke krijuar një potencial të paidentifikuar tensioni dhe prishjeje të harmonisë sociale. Cenimi i përsëritur i sigurisë së të dhënave personale të qytetarëve shqiptarë dëshmojnë për nivele me të vërtetë të dyshimta të profesionalizmit dhe seriozitetit nga ana e institucioneve të ngarkuara për ruajtjen dhe menaxhimin e këtyre të dhënave”, thuhet në njoftim.
Më tej, në deklaratën e tyre zyrtare, Avokati i Popullit i bën apel organeve ligjzbatuese për një hetim të shpejtë të kësaj ngjarjeje. “Avokati i Popullit kërkon hetimin e shpejtë dhe tërësor të kësaj ngjarjeje dhe marrjen e masave urgjente për mbylljen përfundimtare të këtij kapitulli të trishtuar i cili minon besueshmërinë e qytetarëve në organet e administratës dhe institucionet e shtetit shqiptar”, thuhet në njoftimin zyrtar, ndërsa bën apel që kjo çështje nuk duhet të tejkalohet pa u ndëshkuar fajtorët.
Discussion about this post