Drejtori i klubit të Skënderbeut, Ilirjan Përmeti ka shprehur pakënaqësitë e tij në lidhje me vendimet e gjyqtarë ndaj skuadrës korçare. Ai ka reaguar ashpër dhe kërkon që kjo situatë të marrë fund.
“Ne gjithmonë si klub nuk jemi marrë me problemet e gjykimit, por kemi parë vetëm veten tonë dhe zgjidhjen e kërkonim nga lojtarët. Megjithatë, është e pamundur t’u kërkosh lojtarëve maksimumin kur gjithë këto vite një arbitër nuk ka pranuar gabimet, po vetëm janë justifikuar gjithmonë. Nuk e kuptoj se me çfarë guximi një arbitër në kohën e sistemit VAR merr në analizë vetëm një moment pjesën e dytë të aksionit pa e analizuar prekjen me dorë.
Përse nuk ishte penallti prekja me parakrah? Përse nuk u shënjua me vijë sikundër e ka rregullorja pozicioni jashtë loje i Berishës? Këto janë pyetje që të lënë hapësirë për të dyshuar se nuk ishte gabim, por dashakeqësi. Përtej kësaj, në momentin e parë kur VAR hyri në punë në kampionatin tonë, menduam se shumëçka mund të ndryshonte, por nuk e kuptoj se si mund të keqmenaxhohet edhe ky sistem.
Jorgji sërish? Nuk është puna vetëm e një individi, të gjithë po bëjnë gabime karshi nesh dhe kurrë nuk jemi marrë me ta, por çdo gjë e ka një kufi. Vija e kuqe është tejkaluar me ne dhe reagimet e të gjithëve janë të drejta në këto kushte”, përfundoi drejtori i klubit Skënderbeu, Ilirjan Përmeti.
Discussion about this post