Petrit Vasili nënkryetari i LSI përmes një postimi në rrjetin social Facebook i është kundërpërgjigjur kryeministrit Edi Rama mbi solidarizimin ndaj Kosovës për reciprocitetin e targave me Serbinë. Sipas tij Rama ka shumë frikë t’i thotë Serbisë të zbatojë dhe BE-së t’i kërkojë të ushtrojë trysni mbi të.
“Reciprociteti, Rama pro Serbisë….si gjithmonë! Edi Rama thotë: “Duhet që Kosova të dialogojë, Serbia të bashkëpunojë, BE të ndërmjetësojë”. Sepse ka shumë frike të thotë: Serbia te zbatojë dhe BE te trysnojë”, ka shkruar ai.
Më tej Vasili shkruan se Rama i kërkon Kosovës të dialogojë kur ajo ka plotësisht të drejtë.
“Edi Rama i kërkon Kosovës të dialogojë kur ajo ka plotësisht te drejte dhe reciprociteti është barazi dhe jo vasalitet. Barazia nuk dialogohet, por implementohet. Edi Rama ka frikë dhe kjo është tashmë e ditur, që t’i thotë copë Serbisë: zbato e prano reciprocitetin sepse ka vdekur ëndrra e një Serbie të privilegjuar dhe një Kosove të nënshtruar.
Ndaj edhe në këtë rast Edi Rama flet e shprehet, sikur ngjarjet lidhen me shtete e realitete në fund të botës e jo për Kosovën dhe vëllezërit tanë kosovare përballë një Serbie agresive e të prapambetur në politikat e saja arkaike të nacionalizmit të sëmurë dhe krenarisë shoviniste”, ka shkruar ai.
Sipas Ramës, Kosova duhet të dialogojë, Serbia të bashkëpunojë dhe BE të ndërmjetësojë.
