Për herë të parë në 20 vite, numri i serbëve që janë kundër anëtarësimit në Bashkimin Europian është më i lartë se ata që duan të bëhen anëtarë, sipas një sondazhi të ri.
Sondazhi, i cili u krye nga Ipsos dhe u botua fillimisht në gazetën Blic, zbuloi se 44% e pjesëmarrësve janë kundër anëtarësimit, ndërsa 35% janë pro.
Marko Uljareviç i Ipsos tha për Blic se ishte hera e parë që numri i atyre që kundërshtonin anëtarësimin në BE tejkalonte ata që ishin në favor. Presidenti serb Aleksandar Vuçiç tha se gjetjet janë të ngjashme me gjetjet në Partinë Progresive Serbe në pushtet.
“Unë besoj se Serbia ka një vend në Bashkimin Europian, unë besoj se ne duhet të vazhdojmë rrugën tonë evropiane dhe se duhet të luftojmë për rrugën tonë dinjitoze drejt Europës,” shtoi ai. “Ne duhet ta mbajmë pavarësinë tonë në vendimmarrje, të paktën derisa të bëhemi anëtarë të BE-së”. Serbia paraqiti kërkesën e saj për anëtarësim në BE në vitin 2009.
Bisedimet e pranimit filluan në vitin 2014, por tensionet e vazhdueshme midis Serbisë dhe Kosovës e kanë penguar procesin. Edhe pse Serbia po kërkon t’i bashkohet bllokut, Beogradi gjithashtu shikon nga Moska.
Ajo votoi në favor të tre rezolutave të Kombeve të Bashkuara që dënojnë agresionin rus kundër Ukrainës, por nuk i është bashkuar sanksioneve ndërkombëtare kundër Moskës. Ky sondazh vjen pasi ministri i Brendshëm i Serbisë Aleksandar Vulin tha se vendi duhet të rishqyrtojë qëllimin e shpallur për t’u bashkuar me Bashkimin Europian për shkak të presionit të supozuar të Perëndimit për t’iu bashkuar sanksioneve ndërkombëtare kundër Rusisë për luftën në Ukrainë.
Discussion about this post