Sa më shumë qëndron në pushtet, aq më shumë arrogant bëhet në marrjen e vendimeve kryetari i Bashkisë Korçë, Sotiraq Filo. Pasi ua mbyll shkollën fëmijëve në fillim të vitit shkollor, bën një tender 1 milion euro dhe ia jep paratë kompanisë me ofertën më të lartë. Pronarët e firmës fituese “Glavenica” Shpk me bazë në Ballsh, janë mbështetës të hapur të PS-së. Në faqen zyrtare në rrjetet sociale promovohen aktivitetet elektorale të Edi Ramës dhe të Taulant Ballës. Si shpërblim kanë marrë gjithë paratë e “Rilindjes urbane” në këtë zonë.
Dhurata e fundit e “Rilindjes” për këtë subjekt është tenderi i Bashkisë Korçë me objekt “Rikonstruksion i shkollës 9-vjeçare “Sotir Gurra” dhe ndërtim palestre”. Me të ardhurat e bashkisë Korçë do të financohet fondi limit 94 136 419,00 lekë pa TVSH, i prokuruar së fundmi. Projekti me kohëzgjatje 1 vit parashikon përveç punimeve të riparimit, edhe pajisjen me mobilje të klasave dhe mjete të ndryshme.
Ndërkohë tenderi krejt formal është mbajtur më 21 gusht 2025, ku kanë aplikuar 8 kompani. Për mikun kryebashkiaku Filo nuk pyeti se kush ishte në garë, por i fshiu të gjithë nga lista duke i zhvlerësuar ofertat e tyre.
“Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, kështu është klasifikuar nga Open Data Albania tenderi i firmosur nga Sotiraq Filo. Madje procedura është qëndisur me një “Flamur të kuq”, që është shenja e riskut të korrupsionit.
Operator Ekonomik Kontraktues “GLAVENICA” shpk ka pronarë Lavdimir dhe Majlinda Baraj, ndërsa administratore është Jona Baraj. Oferta e paraqitur nga ky operator është 74 243 904,00 lekë, por kontrata me përfshirjen e TVSH pritet të kapërcejë shifrën 1 milion euro. Sipas dokumenteve, formulari i shpalljes së fituesit është publikuar më 19 shtator 2025 dhe mban firmën e Filos.
Kryebashkiaku nuk i përfilli ofertat më të ulëta, duke i skualifikuar me një të rënë të lapsit. Kështu shoqëria “ REJ ” shpk, bëri ofertën me vlerën: 70 190 459.35 lekë pa tvsh
Kompania “ NIKA ” shpk, ofroi ta bënte punën me 63 070 718.17 lekë pa tvsh. Ndërsa firma “ LIS KONSTRUKSION ” shpk, ofroi vlerën: 69 186 506.76 lekë pa tvsh.
Në këto nivele renditet edhe kompania “ XHENGO SHPK ” shpk, që prezantoi ofertën me vlerë: 64 564 163 lekë pa tvsh,
Ndërsa bashkimi i operatorëve “ 2Z KONSTRUKSION ” shpk, dhe “I.C.C GROUP” shpk propozoi vlerën: 68 504 483 lekë pa tvsh.
Dhe ofertën më të ulët e ka bërë shoqëria “ C O L O M B O ” shpk, me vlerën: 62 991 084 lekë pa tvsh. Kjo e fundit, sipas komisionit, u skualifikua se kishte vendosur gabim TVSH-në, duke mos zbatuar udhëzimet. Në fakt, për pjesëmarrjen e kësaj kompanie lindin dyshime se është paraqitur fiktivisht, pasi me kompaninë fituese janë partnerë biznesi.
Për shembull, tenderin e Bashkisë Tiranë “Ndërtimi i pedonales që lidh rrugën “Kastriotët” me rrugën “Taulantët” NjA 11” me vlerë 28 822 796,00 lekë, e kanë fituar të dyja si bashkim operatorësh ekonomikë.
Nga ana tjetër, sjellim edhe një fakt që duhet ta detyronte Sotiraq Filon të peshonte mirë vendimin, nëse vërtet do të mendonte për nxënësit, që ata të mos enden në shkolla të tjera për një kohë të gjatë.
Kompania e familjes Baraj, duke qenë se favorizohet nga zyrtarët e PS-së, është e mbingarkuar me punë publike. Në datën 1 shtator 2025, “GLAVENICA” shpk ka marrë nga kryetarja e Bashkisë Lushnjë, Eriselda Sefa, kontratën 230 milionë lekë “Urbanizimi i qendrës Karbunarë ”.
Edhe këtë tender, familja Baraj e ka marrë me “Flamur të kuq”. Duke qenë se janë në të njëjtën kohë, cilin projekt do të lërë pas dore, kompania, shkollën apo sheshin?
I përmendim këto fakte për dijeni të organeve të auditimit, por edhe të SPAK-ut, ku kryebashkiaku Sotiraq Filo nuk është emër i panjohur. Një denoncim është bërë nga një qytetar, sepse Filo lejoi ndërtimin pa leje të resortit “Morava” në tokën e tij. Ndërsa, një tjetër kallëzim për shpërdorim detyre është bërë për punësimin e personave me rekorde kriminale që i përdor edhe për fushatë elektorale.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post