Deputeti i Partisë Socialiste, Alqi Bllako ka reaguar në lidhje me kërkesën që i ka dërguar SPAK Kuvendit, për heqjen e mandati të tij si deputet, për shkak se është akuzuar se ka gisht në aferën e inceneratorëve. Nëpërmjet një statusi në Facebook, Bllako shkruan se është i tronditur nga kërkesa e SPAK dhe se shprehet i bindur që nuk ka shkelur ligjin.
“Të nderuar miq! Natyrisht jam i tronditur nga kërkesa e SPAK-ut për ndalimin tim. Kam bindjen e thellë që një proces i paparagjykuar dhe i drejtë do ta provonte lehtësisht pafajësinë time; me bindjen e palëkundur se as kam shkelur kurrë ligjet e vendit e madje as kam thyer kurrë etikën e detyrës që kam ushtruar! Sidoqoftë, nuk ka arsye të angazhohet Kuvendi i Republikës së Shqipërisë për këtë çështje dhe as nuk dua të përfitoj apo të më ofrohet një trajtim ndryshe nga çdo qytetar tjetër i vendit tonë. Unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik” – shkruan Bllako.
Bllako gjithashtu shkruan se ka vendosur që ditën e nesërme t’i paraqes Kryetares së Kuvendit dorëzimin e mandatit të tij si deputet dhe do të përballet me akuzën pa asnjë privilegj.
“Prandaj kam vendosur që ditën e nesërme t’i paraqes Kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj. Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë” – shkruan Bllako.
Bllako ka qenë një emër i lakuar në aferën e inceneratorëve në kohën kur ishte në postin e Sekretarit të Përgjithshëm në Ministrinë e Mjedisit dhe ish-nënpunës i ish-ministrit Lefter Koka, i cili ndodhet në burg për këtë arsye.
Pas lënies së mandatit të tij, radhën për të hyrë në Kuvend e ka ish-kryeministri socialist, Pandeli Majko, i cili nuk arriti të hynte në Parlament në zgjedhjet e 25 Prillit 2021.
Discussion about this post