Tottenham nuk është një mundësi transferimi për Kylian Mbappe kur lojtari të ketë përfunduar kontratën me PSG në verën e vitit të ardhshëm.
Edhe pse një lëvizje të tillë ia ka kërkuar vetë “Spider-Man”, Mbappe nuk ka ndër mend të bashkohet me londinezët, të cilët në fakt nuk janë në garë për të përfituar shërbimet e tij.
Aktori që luan superheroin, Tom Holland ka treguar se ai i ka kërkuar francezit që të transferohej në veri të Londrës, por diçka e tillë ka qenë shumë qesharake për Mbappe-n.
“Ne shkuam në ceremoninë e Topit të Artë dhe takuam Messin, ishte çmenduri. Ne takuam edhe Mbappe-n, unë në fakt i thashë atij që duhet të vijë te Tottenham dhe ai vetëm shpërtheu në të qeshura”, tregoi Holland.
Prej kohësh, Mbappe është synim i Real Madrid, por PSG ka refuzuar ofertat e vazhdueshme të spanjollëve. Edhe vetë francezi nuk e ka fshehur dëshirën për t’u transferuar në Madrid, një lëvizje që mund të ndodhë verën e ardhshme.
Discussion about this post