Qeveria synon që në vazhdim të parashikojë një fond prej 50 milionë eurosh që do të shkojë si formë garancie për ndërmarrjet e vogla dhe të mesme (NVM) në rast se do të duan mbështetje financiare për të ndryshuar linjat e tyre aktuale të prodhimit me linja të reja.
Planet për të rritur aksesin në financim për këto ndërmarrje zbardhen në strategjinë e investimeve dhe zhvillimit të biznesit të bërë publik nga qeveria vetëm pak ditë më parë në faqen e konsultimeve. Kështu sipas këtij plani synohet që për të rritur aksesin në financim të bëhet se pari një rikonceptim i skemave ekzistuese për NVM-të duke krijuar një Fond të Vetëm.
“Zhvillimi i një platforme qendrore online për përmirësimin e ofrimit të informacionit dhe proceseve të aplikimit dhe prezantimi i skemave mbështetëse shtesë, të tilla si garancitë e kredive. Do të krijohet instrumenti i garancisë prej 50 milionë euro për manifakturën në rastet e ndryshimit të porosive për të përballuar kostot e ndërrimit dhe kalimit në linja prodhimi të reja (sëitching costs)” thuhet në dokumentin e ministrisë.
Strategjia ndalet edhe tek një tjetër aspekt që i shërben zhvillimit të kapitalit njerëzor dhe në këtë kontekst parashikohet që të krijohen edhe programe specifike ku do të mbulohen kostot e trajnimit.
Kështu sipas strategjisë do të krijohen programet “Inovacion dhe ekselencë në manifakturë” dhe “Inovacion dhe ekselencë në IT” për trajnime në inovacion, dizajn, marketing, kërkim dhe zhvillim nëpërmjet mbulimit të kostove të trajnimit 100%.
“Kostot do të rimbursohen 50% direkt dhe 50% si 2-fish i tatimit të zbritshëm ndaj shoqërive ku është i punësuar përfituesi. Kostot e këtyre programeve do të përcaktohen gjatë përgatitjes së politikave fiskale në vijim” thuhet në dokument.
Kjo politikë trajnimesh do të ketë në bazë disa vlerësime që do të marrin parasysh nevojat për këtë hap. Në këtë kontekst do të bëhet hartimi i një metodologjie dhe vlerësim vjetor i nevojave për trajnim, duke u fokusuar në nevojat afat-shkurtra për trajnim të NVM-ve. Do të ofrohet asistencë për NVM-të për identifikimin e nevojave të tyre të brendshme dhe masat e duhura për rritjen e aftësive Zhvillimi i një platforme online për informim mbi ofertën për trajnime dhe do të bëhet forcimi i lidhjeve ndërmjet NVM-ve dhe ofruesve të trajnimeve.
