Shtangisti nga Elbasani, Franko Ferra bëri një paraqitje fantastike në kampionatin për moshat duke thyer plot gjashtë rekorde kombëtare. Ferra ngriti 144 kg në shkëputje dhe 175 në shtytje, duke merituar në fund edhe vlerësimet.
Trajneri Ilir Çela ka theksuar se Ferra do të arrijë shumë në të ardhmen.
“Ishte një garë emocionuese, ku pati rekorde dhe vlerësime. Si sportisti më i mirë i Shqipërisë për të rinjtë deri në 20 vjeç, shpallet Franko Ferra, me 144 në shkëputje dhe 175 në shtytje, duke thyer edhe gjashtë rekorde kombëtare. Kjo tregon që sportisti elbasanas jo vetëm që po e ruan traditën, duke dhënë forma të mira dhe suksese nga gara në garë, por me sa duket, edhe vendimi i federatës është që në muajin janar sportisti t’i atashohet ekipit kombëtar të të rriturve të Shqipërisë, çka përbën jo vetëm një sukses për këtë sportist, por edhe për qytetin e Elbasanit. Dihet që ky qytet ka një traditë në sportin e peshëngritjes, por duhet të theksojmë që edhe sportistët e tjerë u paraqitën me autoritet dhe patën cilësi të lartë sportive”, tha trajneri Çel.a
Vetë sportisti u shpreh i lumtur për këtë arritje.
“Kam dalë kampion për shkak të stërvitjes që kam bërë me profesor Çelën. Gjatë gjithë kësaj kohe jam stërvitur për t’i arritur këto rezultate të mira dhe puna po shpërblehet. Në garën që do të bëjmë në Sarajevë synoj vendin e parë dhe ju premtoj se do të nderoj flamurin kuqezi”, përfundoi shtangisti elbasanas.
