Deputeti i PD-së Tritan Shehu ka reaguar pas njoftimit të Prokurorisë për ndalimin e publikimit në media të informacioneve që kanë rrjedhur si pasojë e hakerimit të të dhënave. Shehu tha se medias “ nuk mund t’i mbyllen as sytë e as veshët, e aq më pak goja”.
Sipas tij “media në këtë rast shërben si “një këmbanë” e fortë alarmi e sensibilizimi të opinionit për sa po ndodh dhe rreziqet që paraqet kjo për stabilitetin e vendit”.
Postimi i Shehut:
Kësaj i thonë “kur nuk ke çfarë t’i bësh gomarit i bie samarit”!
Policia, prokuroria dhe institucionet e tjera në vend që të kërcenoje mediat, duhet:
— Të mbrojnë të dhënat sensitive nga hakërimi, gjë për të cilën janë shpenzuar miliona e miliona Euro.
—Të sqarojë pse arrihet kaq lehtë të zbulohen të dhënat sensitive në Shqipëri, gjë që po përsëritet prej kohësh.
—Të kërkojnë dënimin e atyre që janë përgjegjës në Shqipëri për ndërtimin e një sistemi të tillë kaq vulnerabël të mbrojtjes së atyre të dhënave.
—Të identifikojnë kush e ka realizuar hakerimin, të kërkojnë qoftë dhe dënimin e tyre formal, etj.
Këto janë detyrat e policisë, prokurorisë e të shumë institucioneve të tjera.
Nuk është kërcënimi e dënimi i medias, qe i ka marrë këto të dhëna nga burime të publikuara më parë, as detyra dhe as e drejta e policisë e tyre në një vend demokratik.
Përkundrazi, media në këtë rast shërben si “një këmbanë” e fortë alarmi e sensibilizimi të opinionit për sa po ndodh dhe rreziqet që paraqet kjo për stabilitetin e vendit.
Medias nuk mund t’i “mbyllen” as sytë e as veshët.
Aq më pak nuk mund t’i “mbyllet” goja!
Kjo është demokracia.
Është e palejueshme të përdoren akte kriminale të realizuara nga të tjerë në një terren të brishtë sigurie në vend, për të cenuar parimet e demokracisë.
Për të cunguar liritë e medias.
Discussion about this post