Elbasani mposhti Partizanin me rezultatin 2-0 në shtëpi, në sfidën e javës së 27-të. Sukses i rëndësishëm për verdheblutë, që afrohen me katër vendet e para në renditje.
Skuadra e drejtuar nga Ivan Gvozdenovic iu fal dy penalltive të kthyera në gol nga Emiljano Musta në minutat 37 dhe 89.
Nga minuta e 71-të, kryeqytetasit luajtën me 10 lojtarë, pasi Mehmeti u ndëshkua me karton të kuq. Për Partizanin kjo është humbja e tretë radhazi në kampionat, ndërsa nuk njohin fitore prej gjashtë ndeshjesh.
Takimi tjetër i zhvilluar më herët mes Laçit dhe Vllaznisë përfundoi në barazim 2-2. Fillimisht ishte Laçi që kaloi në avantazh me anë të Myrtas në minutën e 10-të, ndërsa tresa nga pika e bardhë e penalltisë do të dyfishonte shifrat në minutën e 25-të.
Me rezultatin 2-0 do të mbyllej edhe pjesa e parë, teksa 45 minutat e dyta do të flisnin për shkodranët, të cilët ia dolën të gjenin golat. Fillimisht ishte Çoba në minutën e 55-të që do të rihapte sfidën, ndërsa për të vendosur baraspeshën mendoi Mensah në minutën e 63-të.
Minutat e mbetura do të ishin edhe më të luftuar, por asnjëra prej ekipeve nuk ia doli të gjente rrugë e rrjetës për të siguruar 3 pikët. Kështu skuadrat ndajnë nga 1 pikë në kuadër të javës së 27-të të kampionatit.
Tre ndeshjet e tjera të javës së 27-të janë programuar për të dielën. Takimi i parë do të zhvillohet në orën 14:00 në stadiumin “Adush Muça”, ku do të përballen Bylisi me Skënderbeun. Në 17:00 do të luhen dy takimet e fundit të javës së 27-të; Tirana – Dinamo City dhe Egnatia – Teuta.
Discussion about this post