Superiorja zhvillon ndeshjet në tri ditë, java e 15-të nis këtë të premte

Java e 15-të e Superiores do të luhet e ndarë në tri ditë.

Siparin e ngre ndeshja e ditës së sotme, mes Bylisit dhe Vllaznisë. Ky takim do të luhet duke nisur nga ora 13:30, në stadiumin “Adush Muça” në Ballsh.

Ballshiotët do të kërkojnë 3 pikët për t’ju larguar vendit të fundit, ndërsa shkodranët për t’i marrë kreun Partizanit.

Skuadra e Dedes vjen nga humbja në javën e shkuar me Egnatian dhe kuqeblutë nga fitorja ndaj Teutës.

Të shtunën do të zhvillohen tri sfidat e tjera të javës. Laçi – Skënderbeu dhe Egnatia – AF Elbasani do të luhen në orën 13:30, ndërsa në 16:30, Dinamo City do të përballet me durrsakët e Teutës.

Java do të mbyllet me duelin më të rëndësishëm, Tirana – Partizani, që do të luhet të dielën e 1 dhjetorit dhe do të startojë në orën 19:00.